Стопанската комора во Прилеп: Без обука, нема лиценца за меѓународен транспорт

Добивај вести на Viber

Стопанската комора на Македонија денеска во Прилеп го промовираше проектот за стручно оспособување на меѓународни возачи и управители во патниот сообраќај.

„Ние како Стопанска комора сме овластени да ја спроведеме стручната  обука, за потоа возачите и управителите да полагаат испит. Сертификатот е еден од документите со важност од пет години, без кој не ќе може тие да излезат надвор од земјава, ниту да вршат меѓународен транспорт“, изјави Митко Митевски од Стопанската комора на Македонија, кој во Прилепската регионална стопанска комора го образложи проектот.

Обуката е еднодневна, трае  неколку часа и претежно ќе се врши во просториите на Стопанската комора, информираа од комората офд каде посочија дека според евиденцијата, во државата се околу 12.000 меѓународни возачи, а доста има во Прилеп зашто тука се неколку транспортни фирми.

Обуките за возачи ќе се одржуваат секој месец, почнувајќи од овој месец и тоа во определени термини - на 22 февруари, 22 март, 19 април, 23 мај, 21 јуни и 19 јули, а за управители на 15 март, 26 април, 31 мај, 28 јуни и 12 јули.

Возачите ќе се обучуваат на теми од безбедноста на сообраќајот на патиштата и меѓународен превоз на стоки и на патници, а за управителите главни теми се договор за превоз во патниот сообраќај, организација на трговските друштва, работни односи, даноци, такси и надоместоци, финансиско работење, техничките стандарди на превозните операции и за безбедноста на сообраќајот на патиштата.