Субрата Рој почна да го продава имотот за пари за кауција

Добивај вести на Viber

Индискиот бизнисмен Субрата Рој го продаде првиот имот во обид да обезбеди пари за кауција и да излезе од затворот Тихар. Земјиштето на кое беше планирано да се изгради луксузниот комплекс „Сахара Сити“ во Ахмедабад е продадено на локалната компанија „Сафал енд Гојал“.

Земјиштето е со површина од 421.000 квадратни метри, а за него купувачот платил 4,6 милијарди рупии (околу 78,3 милиони долари).

Инвестициската шема за изградба на „Сахара Сити“ Рој започна да ја гради пред неколку години, прибирајќи пари од ситни инвеститори во замена за вили во луксузниот комплес. Но, многу од купувачите се пожалија дека Групацијата „Сахара“ уште не им ги изградила домовите, иако ја платиле целата сума за нив.

„Ние ќе изградиме куќи за оние кои вложија пари во овој проект на Сахара“, вели новиот сопственик на имотот Дхирен Вора, кој вети дека граѓаните нема да бидат измамени и покрај промената на сопственоста.

Тој додава дека парите од продажбата, според насоките од индискиот Врховен суд, биле уплатени на сметката на „Сахара“ што е под контрола на регулаторното тело СЕБИ.

Од Групацијата Сахара не сакале да ја коментираат продажбата. Оваа сума сепак е само „капка во морето“ за огромната кауција која мора да ја плати Рој за да излезе од затвор.