Судеше во „Тенк“: Кацарска е предложена за уставен судија
Објавено во: Македонија 29 Септември, 2020
Судијката Добрила Кацарска е предлогот на Судскиот совет за нов уставен судија. На денешната седница на советот предлогот бил едногласно усвоен по што ќе биде доставен до Собранието за избор.
Инаку мандатот на уставниот судија е девет години, без право на реизбор.
Судскиот совет може да предложи двајца од вкупно девет судии колку што брои Уставниот суд. Судијката Кацарска е предложена на местото на досегашниот уставен судија Владимир Стојановски, чијшто мандат веќе е истечен.
Судијката Добрила Кацарска е избрана за судија во Основниот кривичен суд во Скопје во 1986 година.
Од попознатите предмети во јавноста, Кацарска ги судеше најобемниот предмет за настаните од 27 април и случајот „Тенк“ за начинот на набавка на блиндираниот „мерцедес“ во кој на затворски казни се осудени Никола Груевски, Гордана Јанкулоска и Ѓоко Поповски.