СВЕТОМИР ШКАРИЌ ЗА ФАКТОР24: Коалициска влада со надпартиски премиер

Добивај вести на Viber

Професорот по уставно право предлага влада со независна и надпартиска личност, со високи лични и морални квалитети, кој ќе може трпеливо и со многу компромис да ги усогласува партиските ставови на коалициските поддржувачи.  Според Шкариќ, во ова политичко невреме - “Немаме потенцијали и амбиент за уставни реформи. Кога ќе порасне свеста за враќање на владеењето на правото и законите, тогаш би се реформирал овој Устав, што пред 25 години е донесен на брзина и на диво. “

Изборните резултати ја потврдија имагинацијата на луѓето кои повеќе не трпат ”митови, а најмалку лидери кои сакаат вечно да владеат“. Тесната разлика во македонскиот блок и разбивањето на монополот на ДУИ во албанскиот електорат е добар сигнал дека во центарот на политичките и партиските интереси ќе се вратат приоритетите на граѓаните, како и компромисот како и модел на владеење. Овие оценки професор Шакриќ ги изнесе во интервју за емисијата ФАКТОР24 проект на веб порталот Фактор што се емитува на ТВ 24 Вести.

“Штом во една држава и во општеството доаѓа до промена во односот на силите тоа е добар знак дека ниту една наредна власт во иднина не ќе може долго да се одржува, долго да владее и долго да манипулира. Овие избори и резултати ја покажаа силата на граѓаните. Од овој момент повеќе никој нема монопол врз народот, да се повикува на него и да го злоупотребува во тесно-партиски и лични интереси. По 2оо6 година настана прекин на демократскиот развој на Македонија. До тогаш иако не беше сјајно, барем бевме на патот да бидеме демократска држава, дури и пред Хрватска. Овие избори се надеж дека во Македонија има сили кои сакаат да ги прекинат антидемократските процеси, кои ги казнија патриотите што на власта гледаат и ја практикуваат не за општо добро, туку во корист на теснопартиските и лични интереси. По овие избори Македонија влегува во фаза на самообединување, повеќе ќе се гради како граѓанска, помалку како национална држава.  Се покажува дека етносот, користен во кампањата во албанскиот и македонскиот блок не е доволен фундамент, дури беше и ретроградрен процес во демократизацијата на Македонија.“

Според професорот Шкариќ претстојат и петти вонредни парламентрани избори а резултатите ќе ги принудат партиите да одат на создавање  поширока владина коалиција, иако честите предвремени избори ги деградираа македонската плуралистичка и демократска пракса. Во интервју за Фактор24 на ТВ 24 вести, професор Шкариќ зборува и за стравот или идеите за федерализација на Македонија.

“Кога ќе нарасне свеста за владеење на правото и на законите тогаш би се реформирал и овој Устав. Федерализацијата и унитарноста се поими и процеси за кои македонските политичари многу малку знаат. Во Европа има нови тенденции на федрализација што ја зафатија и Велика Британија по дисолуцијата на Шкотска. На глобален план светот се федерализира, а на локален се унитаризира. Таа врска помеѓу овие форми на државно уредување е многу деликатна и чувствителна и заслужува темелна и стручна дебата.  Таа неможе да биде поттик за изборно-пропагандни цели, што се покажа и погрешно од авторите во Македонија. “

Според Професорот по Уставно право СЈО мора да остане и засега е единствена независна иинституција.

“Какво е неговото значење се потврдува и со последниот извештај на Брисел за Македонија  каде пишува дека државата може да се врати на европскиот пат само ако СЈО ги добие сите потребни овластувања и нормално да ги извршува задачите во битката со криминалот и правната сигурност на граѓаните. СЈО ќе се одржи и на подолг рок”, оцени Шкариќ во синоќешното интервју за телевизискиот магазин Фактор 24, што го води и уредува Горазд Чомовски.