Светска Банка ни позајми 50 милиони долари за зајакнување на конкурентноста

Добивај вести на Viber

Одобрени  50 милиони долари за Македонија од Светска банка од  Првиот програмски заем за конкурентни развојни политики. Ова е првиот од двата кредити за кои треба да ги поддржат реформите за зајакнување на конкуретноста на македонската економија.

Како што соопштија од Канцеларијата на Светска банка во Македонија, проектот ја поддржува програмата на Владата, насочена кон зајакнување на конкурентноста на стопанството преку мотивирање на продуктивните инвестиции и технолошка надградба на производството, агробизнисот и секторот за трговска логистика, како и креирање на услови за прогресивно зголемување на флексибилноста на пазарот на труд и развојот на вештини.

„Поддржаните активности имаат за цел развој на производството со висока вредност, олеснување на реструктурирањето на агробизнисот и подобра ефикасност на трговско-логистичките услуги. Тоа ќе биде постигнато преку приоритетни активности кои ги поттикнуваат инвестициите и технолошката надградба, како и отстранување на пречките кои ги попречуваат влезот и развојот на компаниите во главните извозно ориентирани сектори во економијата. Заемот, исто така, ќе поддржи активности кои овозможуваат подобри услови за поттикнување на флексибилноста на пазарот на труд и развојот на релевантни работни вештини. Во комбинација со подобрувањата кои Македонија ги оствари генерално во деловното опкружување, оваа реформска програма има потенцијал да го зголеми економскиот раст на среден рок“, истакна Џон Габриел Годар“, лидер на тимот на Светска Банка.

Проектот, исто така, работи на подобрување на ефективноста на јавните програми кои го поддржуваат развојот на приватниот сектор и со тоа, ја зголемува ефикасноста на јавната потрошувачка додека со подобрување на институционалната основа и буџетот за овие поддржани програми, се очекува заемот да ја зголеми ефикасноста на јавната потрошувачка и да ја зајакне одговорноста.

Меѓународната економска криза во 2009 година и тековната должничка криза во еврозоната ја забави зголемената економска активност во Македонија. За време на целиот тој период, земјата успеа да одржи стабилна макроекономска состојба и имплементираше реформска програма со која постигна фискална консолидација и подобрувања во пазарот на труд. Досегашните реформи, исто така, доведоа до значителни подобрувања во деловното опкружување, што ја донесе земјата до 23-то место во Извештајот на Доинг Бусинесс 2013. Но, лошата економска состојба во ерозоната влијаеше негативно врз економската активност и буџетските приходи. Покрај скорешните достигнувања во политиките, економскиот раст не беше доволен за да ја намали долгорочната невработеност и сиромаштија. Предизвикот со кој се соочува Македонија е да ја пренесе својата економија во линија на повисок раст, преку развивање на поконкуретен и претприемнички сектор ориентиран кон извоз, се наведува во соопштението од Светска Банка.