ТЕНЗИЧНО ВО СЕДИШТЕТО НА ДУИ: Тројца потпретседатели го напуштија состанокот, Ахмети убедува за коалиција со Груевски

Добивај вести на Viber

Тензично е во Мала Речица, дознава Фактор од свои извори кои се наоѓаат пред седиштето на партијата на Али Ахмети.

Состанокот на кој се дискутира и одлучува за коалиција или не со екс партнерот Никола Груевски поминувал низ тензична атмосфера и со расправии.

Несогласувања околу ставот на лидерот на партијата Али Ахмети да прифати коалиција со ВМРО-ДПМНЕ најверојатно, но неофицијално е причината поради која тројцата потпретседатели Теута Арифи, Невзат Бејта и Изет Меџити го напуштија состанокот кој уште трае во Мала Речица.

Фактор ги бараше потпретседателите на ДУИ кои ја напуштија седницата, меѓутоа Арифи, Бејта и Меџити не креваа на телефон.

Нашите извори исто така брифираат дека Ахмети најверојатно е ЗА коалиција со долгогодишниот партнер Груевски и дека се водат интензивни разговори со ВМРО-ДПМНЕ.

Двете партии „запнале“ кај две прашања а тоа се употребата на албански јазик на територијата на цела Македонија како и мандатот на СЈО.

Неофицијално наши извори велат дека на ДУИ им е понудено претседателско место во Собранието.

Претходно, во кратка изјава за медиумите кои нетрпеливо ја чекаат одлуката на раководството на ДУИ, портпаролот Бујар Османи изјави дека за нив е важна Платформата на Албанците и начинот како тој договор ќе се реализира и дека нема несогласувања за идните чекори.