Трифонов реагира затоа што бугарски пожарникари помагаа во гаснењето пожари во Македонија

Добивај вести на Viber

Лидерот на бугарската партија „Има таков народ“ која победи на неодамнешните парламентарни избори, Слави Трифонов се огласи на Фејсбук со критики за неговата држава што испратила помош за гасење на пожарите во Македонија кога и во Бугарија беснеат пожари.

„Ситуацијата со пожарите на Балканот е исклучително тешка. Прекрасно е да имаш добри соседи кои можат да одговорат на барањата за помош кога треба. Прекрасно е да си солидарен, да си добар и да даваш поддршка. Но, не мислам дека кога твојата куќа и куќата на соседот горат истовремено треба да одиш и да ја гасиш таа на комшијата. Одлично е што ѝ помагаме на Северна Македонија и така треба, но каде води тоа? Кај нас недостигаат пожарникари и со пожарите треба да се справуваат шумските работници“, пишува Трифонов.

Потсетувајќи дека во Бугарија настрадале пожарникари, тој вели дека бугарската држава треба неодложно да го мобилизира сопствениот потенцијал за да се справи со пожарите во земјата, но и да побара помош од Европската Унија. 

Во Македонија има повеќе жаришта. Гори и во Грција и Турција.