Црвенковски и Груевски во клинч за буџетот, ВМРО ДПМНЕ на помош повика и студенти и синдикати!

Добивај вести на Viber

Власта и опозцијата не можат да најдат заеднички јазик за Буџетот за 2013 година. Ниту, по денешната, втора координација кај спикерот Трјако Вељановски, нема договор. Нова координација, трета по ред е закажана за утре.

Наташа Стојановска

Опозицијата го одби и денешниот предлог на првиот парламентарец Трајко Вељановски.  Предлогот на Вељаноски бил, сите амандмани за буџетот да бидат испратени до Владата односно до министерството за финансии, и наместо за нив да се расправа во собраниските комисии, Владата писмено да се изјасни за амандманите. Ова би значело дека Владата писмено ќе треба да каже кои амандмани ги прифаќа, а кое не, по што извештајот би се доставил до Комисијата за финансирање и буџет и до Законодавно-правната комисија. Потоа со записник и до спикерот. Но, ваквиот предлог СДСМ го одби со став дека тоа значи кршење на Деловникот но и дека предлогот не нуди решение.

„Предлогот на Трајко Вељановски , претпоставувам дека е даден во името на ВМРО ДПМНЕ и во име на Владата , е  безобразен , неддоличен и е кафанско пазарење. И предтходно и сега и до крај информираме дека ние со парите на граѓаните не се ценкаме и во таков пазар не влегуваме “, изјави Игор Ивановски од СДСМ.

Министерот за финансии, Зоран Ставрески, неколку часа по зваршувањето на координацијата кај Вељановски , на прес конференција од салата на Владата порача дека предлогот за нив е прифатлив.

„ВМРО-ДПМНЕ направи големи напори да дојде до деблокада на буџетот “, изјави министерот за финансии Зоран Ставрески, додавајќи дека амандманите ќе се разгледаат внимателно и оние амандмани што се совпаѓаат со концептот на владата, а тоа е подобрување на животниот стандард на граѓаните, ќе бидат прифатени.

Сепак, со оглед дека и денеска нема договор меѓу власат и опозицијата за  деблокирање на носењето на Буџетот за 2013 година, за утре е закажана нова координација кај спикерот Вељановски. На утрешната средба, најверојатно ќе биде повикан и пратеникот Изет Зеќири кој има поднесено околу 400 амандмани. Ќе бидат повикани и ДПА, која има исто така има поднесено неколку стотици амандмани.

Во меѓувреме , во тензична и напната атмосфера, продолжува дебатата за амандманите во Комисијата за финансирање и буџет, каде досега се  поминати 156 амандмани од вкупно 1.225 колку што има поднесено. И пратениците од власат и пратениците од опозицијата во салата, речиси и да не дебатираат за амандамните туку меѓусебно се обвинуваат за тоа кој е виновен за ваквата состојба, а не запираат ниту дофрлањата од место додека некој зборува од говорницата.

Инаку, понеделник, е последниот ден до кога претседателот на Собранието може да го стави Предлог-буџетот како точка на дневен ред на пленарна седница, за тој да може да биде донесен на 31 декември.

Штипските студенти реагираат на блокадата на буџетот . Студентскиот парламент на универзитетот „Гоце Делчев“ од Штип и посочи на опозицијата да има предвид оти со политичките интереси се загрозува и нивното образование и реновирањето и изградбата  на нови студентски домови. „ Секој студент во Република Македонија живее и опстојува од парите за стипендии и кредити, блокирањето на буџетот значи дека сите студенти ќе бидат оставени без пари кои им се потребни и со кои се школуваат. Политичкиот инает и пазар не смее да го загрозува образованието на младите и да ја доведува во прашање нашата иднина, рече Горан  Стаменков, претседател на студенскиот парламент.

Навремено носење на буџетот побараа и Синдикатите на полицијата и на одбраната

Заради интересите на полицијата и на армијата, нивните Синдикати  бараат да се најде начин Буџетот навреме да биде донесен.

„Повикуваме на размисла за последиците по внатрешната и надворешната безбедност во државата, бидејќи економската нестабилност, политичката криза, со сигурност предизвикува и безбедносна криза, изјави Тихомир Климоски, претседател на македонскиот полициски синдикат.

„ Секое ненавремено донесување за Република Македонија ќе значи далекусежни негативни реперкусии, а најглавната е ротацијата на мировните мисии во почетокот на 2013 година. Тоа како држава кандидат за членство во НАТО, особено за секторот - одбрана, ќе значи и несериозност како партнер кон сите останати земји кои партиципираат во мисиите, изјави Ристо Ајтов од Синдикатот на одбраната.