ЦУК со апел за гаснење на пожарот во манастирот Трескавец

Добивај вести на Viber

Според најновите информации пожарот во манастирскиот комплекс од 13 век – „Успение на Пресвета Богородица“ – Трескавец избувнал во 14 часот попладнево.

По пријавата за пожарот од монахот од манастирот, според кој, огнената стихија е голема и со неа е зафатен голем дел од објектот, се преземаат мерки за интервенција од противпожарни екипи.

Центарот за управување со кризи во Прилеп веќе упати апел до сите граѓани кои поседуваат теренски возила веднаш да се упатат кон манастирот и да помогнат колку што можат во гаснењето на пожарот.

Поради пожарот кој го зафати манастирскиот комплекс Трескавец Градоначалникот на Општина Прилеп Г-дин Марјан Ристески свика вонредна седница на Советот на Општина Прилеп како и на Економскиот совет. Според најавите на седницата ќе биде разговарано за пожарот кој го зафати манастирскиот комплекс.

Манастирот Трескавец изгоре до темел пред околу три децении, но манастирското богатство темелно беше обновено во автентичен стил со донации од граѓани и од прилепски фирми.

Со финансии во износ од околу 1,5 милион евра преку Министерството за транспорт и врски неодамна почна изградба на пат до манастирот во должина од 7,5 километри.

Манастирот Трескавец, познат како Света Богородица сместен е на десетина километри од Прилеп, на падините под врвот Златоврв. Во рамките на манастирот се наоѓа и црквата Успение Богородичино. Манастирот има свои конаци и трпезарија. Издигнат високо над карпите во планината, дава прекрасна глетка на околните планини Баба, Бабуна и Кајмакчалан, како и над Пелагонија.