Турција е подготвена да се судри со „Исламска држава“ за ослободување на Мосул

Добивај вести на Viber

Турција ќе разговара со ирачките власти за својата улога во операциите против „Исламската држава“, особено за ослободувањето на Мосул, кога ќе се донесе одлука за таква операција. Тоа го изјавил турскиот премиер Ахмет Давутоглу во Португалија, каде што остварил разговори со својот колега Педро Пасос Коелјо.

„За нас ослободувањето на Мосул од ИД е стратешка и историска мисија. Ирачкиот претседател го овластил неговиот заменик Осама Наџаф да го реши прашањето за ослободувањето на Мосул. Минатата недела тој бил во Турција и разговарале за овие прашања. Засега нема конкретно решение за нова операција или за било какви активности, различни од оние кои веќе се преземени. Ако има таква одлука, Турција, се разбира, ќе разговара за прашањето и за своето учество во операцијата“, изјавил Давутоглу за телевизискиот канал Ен Ти Ви.

По прашањето за двата транспортни авиони на турските вооружени сили, кои на 3 март извршија воени испораки во Багдад, турскиот премиер истакнал дека тоа е направено во согласност со претходните договори.

„Меѓу Турција и Ирак има договори во областа на одбраната и за нас стабилноста во Ирак е од витално значење“, изјавил Давутоглу.