Убиениот во Боливија бил бугарски државјанин, еве што пишуваат српските и боливиските медиуми

Добивај вести на Viber

Познат е целосниот идентитет на македонскиот државјанин кој заедно со двајца Срби беше убиен во јужноамериканската држава Боливија. Како што пренесуваат српските медиуми, станува збор за 43-годишниот Дејанчо Лазаревски од Струмица, познат под прекарот „Македонец“.

Покрај него, жртви на ликвидацијата се и Миљан Ѓекиќ (38) од Ниш, а третата убиена личност сè уште не е официјално идентификувана. Се претпоставува дека имала фалсификувани документи. Првичните сомневања укажуваат дека тројцата мажи биле вмешани во конфликт со локални нарко-картели, можеби во рамките на пресметка меѓу групи поврзани со таканаречениот „балкански картел“.

Телата на жртвите се пронајдени во куќа во населбата Петролеро Норте, во главниот град Санта Круз. Сите биле завиткани во големи црни најлонски кеси, што според истражителите укажува дека убијците планирале да ги отстранат, да ги закопаат или да ги пренесат на оддалечена локација.

Локалниот весник во Санта Курз, „Ел Дебер“ објави дека Лазаревски (43) бил бугарски државјанин, го потврдија и идентитетот на Ѓуриќ според документите кои ги имале кај нив. Исто така беше објавен резултатот од обдукцијата на трите тела.

„Обдукцијата извршена во судската мртовечница Пампа де ла Исла од страна на Институтот за форензички истражувања (IDIF) утврди дека една од жртвите починала од прострелна рана во главата. Другите две починале како резултат на повеќекратни повреди на главата и повеќекратни повреди предизвикани од траума со тап предмет, повреди што се конзистентни со акти на тортура“, вели обвинителот назначен за истрагата, Херланд Родригез.