УЧЕНИЦИТЕ ВО ОСНОВНИТЕ УЧИЛИШТА СЕ ОСЛОБОДУВААТ ОД НОСЕЊЕ МАСКИ: Најнова препорака на Комисијата за заразни болести

Добивај вести на Viber

Комисијата за заразни болести по денешниот состанок соопшти кои нови препораки ќе ги достави до Кризниот штаб, односно до Владата, откако детално ја разгледале епидемиолошката состојба во Македонија во измината недела.

-Врз основа на новиот алгоритам препорачуваме учениците да бидат ослободени од носење маски во основните училишта, но не се ослободуваат наставничкиот и техничкиот персонал, соопшти на прес-конференција претседателот на Комисијата за заразни болести, Александар Петличковски.

Истовремено, тој соопшти дека децата практично ќе имаат избор, ако некој сака да носи маска, секако дека може да ја носи, но генерално препорачуваат, мерката задолжително носење маски за време на наставата се укинува.

„Ако некој сака да носи маска, дома има возрасни членови на семејство, кои сака да ги заштити, не е забрането да носи маска. Но, задолжението, обврската ја укинуваме“, рече Петличковски, додавајќи дека за оваа нивна одлука имало дискусија и била донесена со големо мнозинство од членовите на Комисијата.

Во моментов, како што информираше портпаролот на КЗБ, д-р Злате Мехмедовиќ, параметрите од новиот алгоритам според кој се следи епидемиолошката состојба, земјава се наоѓа во зелена зона.

-Следењето на тие параметри продолжува активно и доколку видиме дека има било какво влошување на епидемиолошката состојба, или зголемување на епидемиолошкиот ризик, тогаш истите мерки, кои беа претходно, можат да се вратат на сила. Но, на ваков начин, постепено олабавувајќи ги мерките, согласно епидемиолошкиот ризик, доколку успееме да ја контролираме на терен епидемиолошката состојба, сметаме дека можеме да не се доведеме во ситуација во која се доведоа земјите како Германија, Австрија, Велика Британија и Данска, каде имаше нагло зголемување на бројот на новозаразени, хоспитализирани и починати“, потенцираше д-р Мехмедовиќ.

Инаку, Комисијата за заразни болести денеска препорача уште две мерки и тоа во однос на капацитетот на исполнетост на затворени објекти. Во театрите, операта и така натаму, капацитетот од 50%, сега препорачуваат да биде 75%, и последната мерка е во однос на сертификатите, кои според новата препорака не мора да се покажуваат во угостителските објекти, но само во отворените делови.

Анита Буховски