УЧИЛИШТЕ ВО КУМАНОВСКО: Овде времето застанало, родителите бараат подобри услови

Добивај вести на Viber

Додека се разгледуваат начините како ќе се одвива наставата од септември, поради пандемијата на коронавурсот, родителите од кумановското село Студена Бара бараат подобри услови за своите деца, затоа што училиштето е старо, и е потребно реновирање на тоалетите.

Тие и досега протестираа и бараа условите да се подобрат, но тоа не се случи. Свесни се дека бројот на ученици е мал, но сепак сметаат дека децата заслужуваат подобри услови.

„Училиштето е катастрофа, треба да се реновира, ние одамна зборуваме за тоа. Посебно тоалетите треба да се средат. Ако се уреди, тоа ќе остане за нашите деца и за во иднина“, вели Сашка Павловска, родител.

Oткако фотографија од тоалетите се прошири на интернет, многу од граѓаните искоментираа дека сме далеку од онлајн настава и дека во земјава постојат многу училишта кои се грејат на ќумбиња.

Ова подрачно училиште потпаѓа под централното „Браќа Миладиновци“. Директорката Марина Манојловска објаснува дека внатре инвентарот е сменет, но проблем се тоалетите. Додава бројот на ученици е мал, а пари за реновирање нема.

„Тоа е проблем кој се провлекува од поодамна. Училиштето има вкупно седум објекти, сосе подрачни, реонски простории, и сите се од времето на Југославија. Кога би имала пари, зарем би го оставила така? Секако дека би го реновирала, но училиштето нема средства, ако не добиеме од локалната или централната власт. Како што паѓа бројот на ученици, сметам дека таму за некоја година нема да има упис, а и соседното училиште во село Пчиња е блиску. Таква е состојбата во многу рурални средини“, вели Манојловска.

Во ова училиште се одржува настава од 1 до 5 одделение, по што децата го продолжуваат образованието во соседното село Пчиња.

Постарите мештани велат дека пред 50 години училиштето имало голем број ученици, но поради иселувањето во Скопје и Куманово, денес бројката е многу мала и на прсти се бројот учениците.