УШТЕ ЕДНО МЕДИУМСКО РАЗОЧAРУВАЊЕ: Гоце Михајлоски си заминува од Нова, причините ги образложи на Фејсбук

Добивај вести на Viber

Новинарот Гоце Михајлоски повеќе не е дел од тимот на телевизија Нова на бизнисменот Сеад Кочан. 

Веста дека дал отказ ја објави на Фејсбук. Наведува дека отказ дал од повеќе причини и тоа концепциски, организациски, кадровски, па се до финансиски. 

„За жал, голем дел од јадрото професионални новинари кое ми даваше надеж дека еден ден ТВ Нова ќе стане „македонски CNN“, последните неколку месеци ја напушти куќата и со тоа трајно и неповратно го урна сонот. Кога прифатив да бидам дел од тимот, силно верував дека е можно да се биде пристрасен, но професионален медиум. Да се биде „провладин“ или „опозициски“ во изборот на темите не е грев, доколку се запазуваат професионалните стандарди и етичките норми во известувањето. Впрочем, така функционираат поголемиот дел од медиумите во пазарните општества - едноставно секој сопственик има одредени политички и бизнис интереси и легитимно е да се обидува да ги наметне во јавниот дискурс. На новинарите е да внимаваат тоа да биде согласно правилата, да нема лаги и клевети, а дали и колку медиумот ќе успее да се наметне во јавноста одлучува господарот на далечинскиот – гледачот. Тој што треба и мора да биде неутрален и целосно избалансиран, според моето мислење, е единствено Јавниот сервис, кој се финансира со пари на сите граѓани. Борбата ние да бидеме професионални во рамки на уредувачката политика, ја водев неуморно секој ден. За жал, некогаш политичките влијанија беа посилни од нас“ - напиша Михајлоски. 

Јавноста го знае Михајлоски како новинар кој подолго време работеше во А1 тв и 24 вести. 

Медиумите објавија вчера дека новинарите од овој медиум се исплашени дека е крај затоа што веќе три плати им доцнат. 

И претходно новинарите се жалеа дека доцнат плати, а деновиве уредничлата Билјана Василева-Трендафилова не беше достапна за коментар.