Вчера задолжување, денес раздолжување, па отчет пред ММФ!

Добивај вести на Viber

Државата вчера бараше околу 100 милиони евра, а се задолжи за речиси 140 милиони евра. Станува збор за две аукции на записи, една аукција на петгодишна обврзница и една на тригодишна. Веќе денес по основ на доспеани хартии од вредност, Владата во реалниот сектор треба да врати 100.6 милиони евра.  Последните расположливи податоци од министерството за финансии покажуваат дека во првиот месец од годинава продолжил трендот на задолжување на Владата. Јавниот долг заклучно со февруари сочинува 33.3 проценти од бруто домашниот производ. Минатата година Македонија заврши со долг од 32 проценти од БДП. За само два месеци вкупниот долг на централната влада има пораст од над 170 милиони евра. Денес се очекува делегација од Меѓународниот монетарен фонд предводена од Ивана Владкова Холар да пристигне на редовни консултации во Македонија. Под лупа ќе бидат ставени вкупната фискална - односно буџетска политика на Владата. Ќе се анализира издржливоста и буџетската кондиција за навремено измирување на долговите. Тимот ќе изврши ревизија на кредитната линија за внимателност, која Владата ја зема во 2011 година. Тој кредит првично беше одобрен во висина од 480 милиони евра, за Владата да се одлучи да повлече 220 милиони евра. Тоа се случи непосредно пред вонредните праламентарни избори.