ВИ ЗАКАЖАЛЕ ОНЛАЈН ИНТЕРВЈУ: Eве совети како да се подготвите и да се претставите во најдобро светло

Добивај вести на Viber

За време на пандемијата на коронавирусот, во земјава почнаа почесто да се организираат онлајн интервјуа за вработување, и денес истите се прават со цел селекција на кандидати. Од агенциите за посредување при вработување, велат дека кандидатите треба соодветно да се подготват за да се претстават себеси во најдобро светло.

На кандидатите им се советува да изберат средина која делува професионално, да има добро осветлување, да се облечат поформално, да ја проверат интернет врската, аголот под кој е наместен лаптопот, да избегнуваат места каде има врева која ќе ги деконцентрира.

„Повеќето компании еден круг од интервјуата прават онлајн. Од практични причини интервјуата ги организираат онлајн, за да се заштеди време и од едната и од другата страна. Ако е далеку локацијата на компанијата, се прави онлајн интервју за кандидатите да не одат таму, да не губат време, да не се мачат околу превозот. За онлајн интервјуто кандидатот треба да биде сериозен,  да ја провери интернет врската, да види дали е сѐ во ред технички, да се подготви за самото интервју, сѐ е тоа важно. Не мора да носат сако, но да бидат соодветно облечeни за интервју. Реално, како кандидатите ќе се претстават на онлајн интервјуто, тоа влијае дали ќе бидат вработени“, вели  Јулијана Миновска, од агенцијата за посредување при вработување Д Хедхантер.

Идеално е просторот зад кандидатот за вработување да биде неутрален. Од друга агенција посочуваат дека е важно, апликантите да бидат реални и искрени во она што го говорат и го напишале во кратката биографија.

„Би ги советувала кандидатите да бидат максимално искрени, затоа што имаме ситуации каде кратката биографија е направена така како што е направена, и кандидатот стои до тоа, но потоа испаѓа спротивното во пракса. Кога нема искреност губат и двете страни, се губи време. Апликантите на онлајн интервјуата го кажуваат тоа што го има во CV-то. Кодексот на облекување треба да е задолжителен. Треба да има свест за тоа, дефинитивно. Но, имаме секакви ситуации, не знам дали свеста е развиена до тој степен во нашата средина“, велат од агенција за посредување при вработување од внатрешноста.

Покрај другото, се советува кандидатите пред себе да имаат лист и пенкало и да запишат битни работи при самото интервју.

Исклучете го телефонот, говорете јасно и со умерено темпо. Бидете спремни и да поставите прашања за компанијата и работниот процес во текот на онлајн интервјуто.

Oнлајн интервјуата се користат во 86 отсто од процесите на вработување ширум светот. Тие им заштедуваат на тимовите за регрутирање во просек 24 отсто од трошоците во споредба со традиционалните интервјуа во живо. Овој тренд е поттикнат од флексибилните опции за работа и растечката работна сила од далечина.

foto freepik.com