(ВИДЕО) „ЈАС СЕ СМЕНИВ, АМА ТИ НЕ“: Еве како му одговори Зеленски на новинарот што минатиот пат го прекори за облеката

Добивај вести на Viber

На последната средба меѓу двајцата лидери во февруари, тој носеше многу полежерна облека, а новинарот Брајан Глен од конзервативниот канал Real America's Voice отворено го праша зошто не носи одело, велејќи дека ова е највисоката институција во земјата.

Вчера, по 19 часот, започна билатерална средба меѓу американскиот претседател Доналд Трамп и украинскиот претседател Володимир Зеленски. Пред средбата со украинскиот претседател и европските лидери, Трамп рече дека денес е исклучително важен ден за САД, нарекувајќи го „одличен ден“ и „голема чест“.

Тој го пречека Зеленски во Белата куќа, а потоа седнаа во Овалната соба, каде што се случи интересна ситуација. Имено, украинскиот претседател дојде на средбата во поформална облека отколку што е навикнат светот - сè уште без класично одело и вратоврска, но во елегантен црн воен костум.

На последната средба меѓу двајцата лидери во февруари, тој носеше многу полежерна облека, а новинарот Брајан Глен од конзервативниот канал Real America's Voice отворено го праша зошто не носи одело, велејќи дека ова е највисоката институција во земјата, а тој не се облекува соодветно, пишува Политико. Зеленски одговори: „Ќе носам одело кога ќе заврши војната. Можеби како твоето, можеби подобро“.

Глен го започна состанокот овој пат со комплимент: „Претседателе Зеленски, изгледате одлично во тоа одело“, рече Глен, на што Трамп веднаш додаде: „И јас го кажав истото“.

Потоа Глен додаде: „Изгледате добро“, а Трамп повтори: „И јас го кажав истото. Се сеќавате? Тоа е човекот што ве нападна минатиот пат. Гледате? Сега е фин човек“. Зеленски се насмеа на тоа и кратко одговори: „Се сеќавам“.

Глен ја искористи можноста да се извини: „Се извинувам. Изгледате одлично“. Но, Зеленски возврати, забележувајќи со насмевка: „Но, ти си во исто одело. Гледаш, јас се сменив, ти не.“ На што Глен одговори: „Можеби твоето е многу подобро од моето.“

Елвира Гасанова, една од дизајнерките на Зеленски зад неговите препознатливи јавни појавувања, за Политико изјави дека претседателот „моментално е во фаза каде што секој детаљ е важен - изглед, расположение, емоција - и затоа внимателно ја избира облеката што најдобро одговара на неговата улога и моментот“.