Владата задоволна сама од себе за планот 3-6-9
Објавено во: Македонија 31 Март, 2018
Владата на Република Македонија соопшти дека е задоволна од својата завршена работа предвидена со Планот 3-6-9, односни дека сите преземени реформски процеси се започнати во предвидените рокови и дека сите владини обврски се извршени, а останува уште изгласување на соодветната легислатива на повеќе законски решенија.
Од Владата нагласуваат дека реформите од Планот 3-6-9 се заокружени во предвидениот рок и дека истите придонеле во забрзување на интеграциските процеси за Република Македонија во ЕУ и НАТО.
„Со денешниот ден, се заокружува периодот предвиден за реализацијата на итните реформски проекти на Владата на Република Македонија, Планот 3-6-9, кој беше промовиран на 5 јули 2017 година, само еден месец откако започна со работа актуелниот состав на Владата. Планот 3-6-9 беше проект за враќање на брзата трака на евро-атлантските процеси, за рехабилитација на функциите на институциите после политичката криза и за иницирање и спроведување реформи во клучните области што произлегоа од извештаите на високата експертска група на Рајнхард Прибе и од заклучоците на преговорите во Пржино“, велат од Владата.
Клучните реформски приоритети, појаснуваат од таму, се однесуваа на обезбедувањето услови за функционален демократски парламент; на реформите во правосудството; на реформите во медиумите; на борба против организираниот криминал и корупцијата; на реформите во јавната администрација; на реформите во безбедносните служби; на промените за обезбедување фер и демократски избори според препораките на ОБСЕ/ОДИХР и сите други релевантни меѓународни организации, како и на кохабитацијата со претседателот на државата.
„Во следниот период, веднаш по усвојувањето на последните предложени законски решенија во Собранието на Република Македонија, Владата на РМ ќе направи сумирање на резултатите од овој процес за што јавноста ќе биде детално запознаена“, порачуваат од Владата.