Владините мерки за заштита на домашната пченица остануваат на сила

Добивај вести на Viber

Сепак, Македонија нема да ги укине ограничувањата при увоз на пченица и брашно се додека не се стабилизира пазарот. Воведувањето заштитни механизми било во согласност со домашното и со меѓународното право.

„Во овој период од кога мерката е воведена, Владата и сите државни институции се фокусирани на надминување на предизвикот што постоеше на пазарот со пченица за да се стекнат услови мерката да биде повлечена. Во овој момент мерката е се уште актуелна, а ние сме фокусирани на подобрување на пазарниот инструментариум“,изјави Александар Ѓорѓиев, портпарол на Владата.

Тој апелираше сите субјекти, домашни и од странство, да покажат конструктивен однос зашто пазарот, рече, е материја што битно зависи од психолошките перцепции, изјави, насоки или определени видови постапки.

„Фокусирани сме, работата оди добро и веќе над 70 проценти од домашното производство на пченица е дистрибуирано меѓу откупувачите. Се трудиме тој процес да биде забрзан и во соодветен период да можат да бидат отстранети условите поради кои беше воведена заштитната мерка.

„Повеќе пати имаме разговарано со сите засегнати страни, кој и да побарал, сме дале информација базирана на аргументи. Очекуваме предизвикот да биде надминат во догледен период“, потенцираше портпаролот на Владата Ѓорѓиев.

Овој владин став е одговор на вчерашниот ултиматум од Белград кој на Скопје му даде рок од една недела да ги укине ограничувањата за српските пченица и брашно, во спротивно од 15-ти август ќе вовеле контрамерки насочени кон македонското овошје, зеленчук и вино.

На вонредниот состанок на ЦЕФТА пред еден месец, било договорено ограничувањата да се укинат во разумен рок. Најновиот проблем меѓу Србија и Македонија е дефиницијата на терминот „разумен рок“.

Заштитната мерка која предвидува задолжителен откуп на 3 односно 4 килограми домашно лебно жито за секој увезен килограм пченица или брашно се воведува четврта година по ред. Но, ова е прва година Србија да го проблематизира тоа.