ВМРО-ДПМНЕ: ДИК да не влегува во сценарија за постизборен инженеринг

Добивај вести на Viber

ВМРО-ДПМНЕ уште еднаш апелира ДИК да не подлегнува под никакви притисоци и да не влегува во ничии сценарија за постизборен инженеринг, со кој би се оспорила волјата на 455 000 македонски граѓани со чии гласови ВМРО-ДПМНЕ освои 51 пратеник, наведуваат од партијата. 

Од ВМРО-ДПМНЕ велат дека внимателно и одблиску, со крајна сериозност и загриженост ја следи работата на Државната изборна комисија и најновото одложување за одлучувањето по според нив апсурдните приговори од страна на СДСМ и БЕСА.

„Целата домашна и меѓународна јавност беа сведоци дека предвремените избори поминаа во мирна, фер и демократска атмосфера без ниту еден инцидент. Изборите во неделата јасно ја одразија волјата на мнозинството од македонскиот народ кој се одлучи за излез од кризата и одбра проекти и реформи наместо деструкција. Државната изборна комисија има една единствена обврска, а тоа е да ја верификува волјата и одлуката на мнозинството граѓани. Државната изборна комисија не смее да подлегнува на притисоците од страна на сценаристите кои сакаат да спроведат постизборен инженеринг. Повеќе од очигледен е договорот меѓу СДСМ и БЕСА за извртување, поништување и фалсификување на волјата на мнозинството од македонскиот народ, нешто што кореспондира со вчерашната прес конференција на Зоран Заев и нешто што очигледно не е само негова одлука“ - стои во соопштението на ВМРО-ДПМНЕ. 

Единствениот критериум по кој се одбирале местата за кои се упатени забелешките е математиката во постизборниот инженеринг која кажува дека со дополнителна трговија со гласови, би можела да биде заобиколена волјата на мнозинството, пишува во соопштението. 

Велат дека ова е незаконски и за ваквите постапки кривично се одговара. Правниот тим на ВМРО-ДПМНЕ внимателно и одблиску ја следи ситуацијата.