ВНИМАВАЈТЕ: Опасен МЕРС вирус се шири од Блискиот Исток

Добивај вести на Viber

Граѓаните на Македонија кои заминуваат на аџилак на Блискиот Исток треба да бидат особено претпазливи поради опасноста од ширење на смртоносниот МЕРС вирус, предупредуваат здравствените власти. Ситуацијата е опасна со оглед на тоа што не постои вакцина за овој вирус. Стотици македонски граѓани заедно со муслимански верници од целиот свет околу Рамазан Бајрам се очекува да заминат на аџилак во Саудиска Арабија. Македонските здравствени власти затоа предупредија на особена внимателност - се препорачува граѓаните кои одат таму да не контактираат со лица кои покажуваат симптоми на грип, како што се висока температура, треска, кашлање и тешкотии при дишењето, бидејќи тие се карактеристични и за вирусот МЕРС. Највнимателни треба да бидат хронично болните. „Постари лица да не одат на аџилак, бидејќи доколку заболат потешко поминуваат за разлика од помладите. Хронично болните треба да се консултираат со матичен лекар, пред да одлучат дали ќе одат на аџилак или не“, изјави д-р Јованка Костовска од Министерството за здравство. Оние кои во овој период планираат да патуваат таму, треба да избегнуваат контакт со камили, да не конзумираат месо што не е термички обработено, да купуваат безбедна вода за пиење и да одржуваат лична хигиена. Начините на пренесување на вирусот допрва се анализираат. Во регионот, едно лице заболено со МЕРС вирус е регистрирано во соседна Грција, но и тоа заболело на патување во Саудиска Арабија. МЕРС е вирус со висок процент на смртност - од 683 заразени лица, 204 починале. Најголемиот број, односно вкупно 600 од случаите се регистрирани во Саудиска Арабија.