Во Штип и Велес ќе се отворат центри за микропретпријатијата

Добивај вести на Viber

 Два регионални центра за поддршка на микропретпријатијата ќе се отворат со проектот на УСАИД за пристап до јавните набавки. Едниот во Штип за источниот регион и другиот во Велес за вардарскиот регион. Регионалниот центар во Штип ќе биде промовиран денеска, а на промоцијата ќе се обратат директорот на УСАИД, Роберт Вурц, штипскиот градоначалник Зоран Алексов, раководителот на Центарот за развој на источниот плански регион, Драгица Здравева, раководителот на проектот на УСАИД за пристап на микропретпријатијата до јавните набавки, Герман Филков и раководителот на регионалниот центар за микропретпријатија од Штип, Бети Пеева. Целта на проектот е да го олесни пристапот на малите и на микропретпријатијата до пазарот на јавни набавки, придонесувајќи за нивниот одржлив развој и подоброто искористување на нивните потенцијали за создавање работни места, раст и иновации. Од друга страна проектот треба да им овозможи постигнување пониски цени и повисок квалитет во јавните набавки. Станува збор за тригодишен проект поддржан и од Бирото за јавните набавки, кој се спроведува во 20 општини од источниот и од вардарскиот регион и во Струмица. Проектот го спроведува Центарот за граѓански комуникации од Скопје во партнерство со „ЕХО“ од Штип и со фондацијата „Фокус“ од Велес. Во рамки на проектот на 200 мали и микропретпријатија од опфатените региони ќе им се обезбедат бесплатни обуки, секојдневна асистенција и стручни консултации при изработка на тендерските документации и при пријавувањето на огласите за јавни набавки. Општите услови за учество на претпријатијата во проектот и за нивно квалификување за добивање помош се тоа да има производи и услуги кои се барани на огласите за јавни набавки и да има максимум до 10 вработени. Предност им се дава на оние претпријатија кои немаат никакво или имаат сосем мало искуство со јавните набавки, како и на оние кои имаат пристап до основна информатичка опрема.