Воведувањето на еврото во Латвија ќе чини 140 милиони долари

Добивај вести на Viber

Воведувањето на еврото во Латвија од 1 јануари 2014 година ќе чини околу 70 милиони лати (140 милиони долари), изјави денеска во телевизиското интервју раководителот на проектот за пристапување на земјата во еврозоната Даце Калсоне, пренесуваат агенциите. Воведувањето на еврото од почеток ќе ја чини држата  8.7 милиони лата (околу 17.4 милиони долари), а половината од трошоците ќе ги преземе Европската унија. Според искуството на другите земји членки на ЕУ, кои се приклучија кон еврозоната, тоа ги чинело меѓу 0.3 и 0.8 проценти од бруто домашниот производ. Во случајот на Латвија, целосното воведувањето на еврото ќе достигне сума од  70 милиони лати, истакна Калсоне, која е поранешен аналитичар на Латвиската централна банка. Информативната кампања за воведување на еврото во државата ќе започне во втората половина на 2013 година . Граѓаните ќе бидат информирани за изгледот на банкнотите, номиналниот износ, девизниот курс и временскиот период во оптек во кој ќе станат единствена, национална валута. Исто така државата планира кампања, во која ќе ги повика трговците да не го користат влезот во еврозоната за зголемување на цените. Во март 2010 година владата на Латвија одлучи да го воведе во оптек еврото од 1 јануари 2014 година. За таа цел земјата требаше да ги исполни критериумите од Мастрихт - ниска инфлација, дефицит во државниот буџет под 3 проценти  и државен долг до 60 отсто од БДП-то. Според податоци на Министерството за финансии,  минатиот месец земјата ги исполнила сите Мастрихтски критериуми.