СДСМ: Вработување во скопските јавни претпријатија само преку партија

Добивај вести на Viber

Списоците за партиските вработувања во скопските јавни претпријатија се кројат внатре во партиите, тврдат опозициските советници.Според нивните информации, се работи за тотално нови вработувања, а не за регулирање на рабтниот статус на веќе вработените. -Некои лица кои се наоѓаат на тие списоци, тврдат дека сите вработувања се договараат во партиите и тоа не се оние кои се привремено вработени, туку напротив, тие се исфрлени од списоците, за на нивно место да бидат додадени и редовно вработени, нови партиски членови, изјави Драги Давчевски, советник од СДСМ во Град Скопје. Иако за оваа точка требаше да се расправа на денешната вонредна седница, сепак информацијата за партиските вработувања ќе се разгледува на следната редовна седница, што ќе биде одржана во текот на месецот. Иако беше присутен, градоначалникот на Град Скопје, Коце Трајановски и денеска не даде изјава за масовните вработувања во претпријатијата што се под негова надлежност. За советниците од владејачката коалиција, оваа точка е само политичка игра од страна на опозицијата, затоа што прво ја ставиле а потоа ја повлекле од дневниот ред. Инаку минатата недела на вонредната седница, директорите на дел од повиканите јавни претпријатија Дрисла, Водовод и канализација и ЈСП Скопје,, децидено изјавија дека се работи за трансформација на постојаните привремени вработувања во редовен статус на вработени. Но сепак некои изјавија дека можеби случајно се погодило двајца или тројца да се членови на ВМРО ДПМНЕ.