„ВРЕДИ“: Гаши е втор човек на државата и има право да го прати обезбедувањето на аеродром за Косово

Добивај вести на Viber

Од коалиција „Вреди“ велат дека како втор човек во државата, Африм Гаши има право да го прати своето обезбедување на аеродромот. 

Велат дека Гаши на 1 август го пратил шефот на неговото обезбедување на скопскиот аеродром „чисто информативно“, да види што се случува со косовската претседателка Вјоса Османи кога аеродромското обезбедување не ѝ дозволило да се качи на комерцијален лет без да ѝ биде поминат личниот багаж и телефонот на скенер. Како што кажа портпаролот на „Вреди“, Фари Хисени, тој не бил таму да прави да прави немири или да се меша во ингеренциите на аеродромот, туку само да види што се случува.

За Гаши, Хисени кажа дека е втор човек во државата и како таков има право да го прати неговото обезбедување на аеродромот за „соседна држава како Република Косово“.

„Претседателот на Собранието во конкретнот случај не предизивкал немири во аеродромот со претседателката на Косово, туку по нејзино барање се упатил шефот на обезбедувањето на Гаши до аеродромот за да види, затоа што стигнало директно јавување кон претседателот на Собранието Гаши. Не со иницијатива, не со поттик да се отиде, да се направи некој немир или да се постапи противзаконто. Гаши по барање на претседател на соседна држава пратил негово обезбедување чисто да види каква е ситуацијата и што се случува. Има право како втор човек на држава за соседна држава како Република  Косово да прати негово обезбедување да види што се случува. Он не води таму истрага, он не води таму кавги со вработените, туку чисто да земе информации што е проблемот со можниот скандал. На вториот човек на државата му припаѓа тоа како можност. Праќање негово обезбедување да види што се случува информативно и мешање во ингеренциите на аеродромот не е исто“, изјави Хисени денеска на прес-конференција.

Против шефот на обезбедувањето на Гаши, полицијата на 5 август поднесе кривична пријава за кривичните дела „загрозување на сигурноста“ по член 144 од Кривичнот законик и „спречување службено лице во вршење службено дејствие“ по член 382 од КЗ, во врска со инцидентот на Скопскиот аеродром со косовската претседателка Вјоса Османи. Шефот на обезбедувањето на Гаши, кој е полицаец, со репетиран пиштол кон свој колега се обидел да го разреши случајот, кога на 1 август аеродромското обезбедување на Скопскиот аеродром не ѝ дозволило на косовската претседателка да се качи на комерцијален лет без да ѝ биде поминат личниот багаж и телефонот на скенер. Левица поради ова бара интерпелација на Гаши, а за негова смена се изјасни и СДСМ.