ВУЧИЌ НАВРЕДИ НОВИНАРИ: Ги нарече имбецили, па се извини

Добивај вести на Viber

Претседателот на Србија, Александар Вучиќ денеска се извини затоа што дописниците на Радио Телевизија на Србија (РТС) од Ниш ги нарече „имбецили“, но додаде дека тие „не се новинари, туку навреда за нивната професија“.

Како што пренесе Бета, Вучиќ во своето извинување објасни дека нема право никого да нарекува имбецил, но и дека „подеднакво лошо мисли за професионалноста и објективноста на споменатите новинари“.

„Верувам дека во ова мое извинување луѓето ја гледаат разликата, не само во одговорноста, туку и во почитта што ја покажувам кон луѓето кои размислуваат поинаку. Верувам дека луѓето ја гледаат разликата во однос на оние опозициски политичари кои се закануваат со смрт, целосно свесно и без волја и желба да се извинат, но и разликата во однос на лицемерниот колегиум на РТС кој не го осуди физичкото попречување и нападот на екипа на РТС за време на протестот на 1 февруари во Нови Сад, ниту претходно во Автокоманда“, изјави српскиот претседател.

Вучиќ оцени дека „пленумот победил на РТС“, а неговата работа како претседател на државата е „да направи да победи правото и моралот во Србија“.

Програмскиот колегиум на РТС и редакцијата на Дописиштвото на јавниот сервис од Ниш ја осудија изјавата на Вучиќ, кој на митингот во Бор ја навреди новинарката на РТС Лидија Георгијев нарекувајќи ја „имбецил“. Во Србија со месеци има протести, откако лани на 1 ноември се урна натстрешница во Нови Сад и уби 14 луѓе на лице место.