Заев: Од обвинителите од СЈО не излезе ни еден разговор и за тоа законски добиле надокнада

Добивај вести на Viber

Нема да дозволам со театарски претстави да се наруши дигнитетот на еден систем. Вака премиерот Зоран Заев му реплицираше на пратеникот од ВМРО-ДПМНЕ, Крсто Јовановски, кој претходно во Собранието, на седница за пратенички прашања, го критикуваше правосудството. Според Заев, не може сега да се кажува дека тоа што се слуша во бомбите, е монтирано, креирано и лепено.

„Да не испадне и дека Космос се рушел законски? Да не испадне сега да ги направиме херои тие луѓе? Не, секој треба да одговара таму каде што има докази. Поради тоа што оваа Влада одлучи да ги објави сите трансакции од Буџетот, треба ли да извлекувате заклучоци и да го навредувате СЈО? Не смееме да дозволиме поединечната одговорност да се префрла на сите, ако еден не постапил како што треба, не може да се бара законска одговорност за сите. Обвинителите во СЈО не дозволија да излезе ни еден разговор од предметите кои ги работеа и за тоа добиле надокнада. Тоа што се трошело во СЈО било 70-80 отсто од тоа што законот го дозволил, ако нешто од тоа е трошено незаконски, треба да се одговара без разлика дали е специјалниот јавен обвинител, обвинител во СЈО или истражител, но не вака со леснотија да унаказите цела институција“, рече Заев.

Според премиерот, Сваровски судството е уште заробено, а не се сменети ниту три отсто од судиите и обвинителите. Тој смета дека неколку поединци заедно ја рушат целата атмосфера и затоа треба да има прочистување.