Заев се сретна со Могерини - ЕУ очекува брзи и мудри одлуки

Добивај вести на Viber

Могерини ги реализираше средбите со лидерите на политичките партии, но единствено Зоран Заев даде изјава откако заврши разговорот со високата претставничка за надворешна политика на ЕУ.

- Среќни сме што ЕУ останува посветена на иднината на Македонија. 67-те мандати се нормален услов за давање на мандатот за формирање влада, а ЕУ ќе ја поддржи идната влада за забрзано членство во Унијата, рече лидерот на СДСМ, Зоран Заев, по средбата со шефицата за надворешна политика на Унјата, Федерика Могерини, која денеска престојува во Скопје.

- Уште еднаш апелираме до Иванов да ја преиспита својата одлука затоа што позади тие 67 мандати стојат близу 700.000 гласачи,а со секое пролонгирање, стравот од ескалација на состојбата е реално присутен. Оттука, првиот чекор е Иванов да ги почитува гласачите кои стојат позади овие 67 потписи. Со вака блокирани институции доведено е во прашање и одржувањето на локалните избори чиј краен рок за закажување е в недела, на 5 март - рече Заев.

Лидерот на СДСМ порача дека остануваат посветени на изнаоѓање брзи, но мудри одлуки.

- Тоа од нас го очекуваат граѓаните, но и ЕУ - нагласи Заев.

Лидерите на ВМРО-ДПМНЕ и на ДУИ, Никола Груевски и Али Ахмети, по средбите со Могерини, го напуштија Собранието без да дадат изјави. 

Следно на агендата на Федерика Могерини ќе биде средба со претседателот Ѓорге Иванов.