Започна пријавувањето за стипендиите „Борис Трајковски“ на извршната МБА програма на Универзитетот Јорк

Добивај вести на Viber

Стипендиите „Борис Трајковски“ за двегодишни вонредни постдипломски студии што заеднички ги нудат Европскиот Кампус на Универзитетот Јорк, СИТИ Колеџ, Министерството за образование и наука и Претседателот на Република Северна Македонија и годинава се достапни за  20 студенти.

Конкурсот за доделување на стипендиите за студии од втор циклус за академската 2023/2024 година е отворен, а заинтересираните до 1 септември ќе можат да аплицираат на една од шесте достапни специјализации - МБА по Општ менаџмент, МБА во Маркетинг, МБА во Финансии, МБА во Логистика и менаџмент, МБА во Управување во здравство и МБА во Управување со човечки ресурси.

Со стекнување на стипендија, кандидатите ќе студираат според Пан-европската извршна МБА програма која претставува меѓународна програма со неограничени можности за вмрежување, специјално дизајнирана за сите кои сакаат да ги подобрат своите вештини и знаења за професионален, кариерен и личен развој и истата е понудена во 8 различни градови низ регионот.

Оваа програма е една од 300те програми акредитирани од Здружението на МБА програми (AMBA) и од Институтот за менаџмент, од Велика Британија (CMI), а вредноста на оваа извршна МБА програма во академскиот свет ја потврдува и заедницата од приближно 4000 учесници и дипломци досега.

Таа меѓу другото нуди и вистинско меѓународно искуство преку три студиски патувања - во Јорк (Велика Британија), во Стразбур (Франција) и во Солун (Грција). Програмата ја предаваат истакнати професори и меѓународни академици од Европскиот кампус на Универзитетот Јорк, СИТИ Колеџ, од Универзитетот Јорк, од Универзитетот во Стразбур, како и други добро признати универзитети ширум светот, и експерти од индустријата со значително професионално искуство.

Покрај врвното образование, стипендистите ќе имаат можност да се стекнат и со двојна диплома, од Универзитетот Јорк и од Факултетот за економија и менаџмент на Универзитетот во Стразбур. И двете образовни институции што ја доделуваат двојната диплома се високо истакнати и рангирани во научниот свет, Универзитетот Јорк е врвен британски универзитет рангиран и Универзитетот во Стразбур претставува престижен француски универзитет од каде имаат произлезено 18 научници наградени со Нобелова награда.

СИТИ Колеџ, Европскиот кампус на Универзитетот Јорк инаку е дел од заедницата на Универзитетот Јорк, водечка британска академска институција, член на престижната Russel група, светски признат по својата истражувачка работа и рангиран на 139тото место во светот според Times Higher Education 2023. Европскиот кампус преку СИТИ Колеџ е лоциран во Солун, Грција, а неговата академска мрежа е воспоставена и распространета во уште 8 земји низ целиот регион со што претставува уникатна меѓународна институција која ги поврзува академските, истражувачките, националните и корпоративните мрежи низ целиот регион.

Заитересираните кандидати за стекнување стипендија „Борис Трајковски“ можат да конкурираат преку следниот линк.