Заврши распитот за осомничени во „Труст“, се чека одлука за притворот

Добивај вести на Viber

Управителот на фирмата „Силекс Неметали“ Василие Авировиќ, осомничен во случајот Труст на СЈО, по три часа распит го напушти судот. 

Речиси истото време во распит го помина и првоосомничениот Сеад Кочан, кој моментално е сопственик на телевизијата НОВА, а претходно беше управител на градежната компанија „Трансмет“. Ниту двајцата по излегувањето од судот не сакаа да даваат изјави за медиумите.

Од судот велат дека решението со одлуката најпрво ќе биде доставена до странките а потоа и до медиумите.

По распитот Судот треба да соопшти дали ги прифаќа мерките на СЈО коишто побараа притвор и други мерки за обезбедување. Доколку Судот не ги прифати мерките, СЈО има право да се жали во рок од 24 часа до Кривичниот совет на Судот, кој пак има 48 часа рок да одлучи дали ќе ја прифати жалбата на обвинителството.

Во случајот „Труст“ осомничени се три правни и три физички лица, а третоосомничен е управителот од фирмата „Вато“ од Студеничани. Тие се товарат дека фалсификувале документи со кои добиле тендер од 17 милиони евра од ЕЛЕМ за ископ на јаглен и јаловина од рудникот Суводол.

Овие три фирми на тендерот настапиле како конзорциум, а главен носител била „Трансмет“.