ЗАВРШИ ЗАЛОЖНИЧКАТА ДРАМА ВО РУСИЈА: Загинаа четворица затворски чувари

Добивај вести на Viber

Заврши заложничката драма во рускиот затвор во Волгоград. Има осум мртви, а специјалците ги убија киднаперите. Загинаа и четири затворски чувари. 

Руската национална гарда информираше дека откако безбедносните сили успеале да влезат во затворот нејзините снајперисти убиле четворица киднапери.

Заложничката криза конкретно се случуваше во казнената колонија бр. 19 во градот Суровикино во регионот Волгоград, кој важи за затвор со максимално ниво на безбедност.

Киднаперите, кои биле затвореници во затворот, претходно наводно со нож извршиле напад врз чуварите, а дел од службениците ги држеле како заложници.

„Сторителите им нанеле убодни рани од различни видови на четворица вработени во затворот, од кои тројца починале. Останатите четворица, кои дале отпор, беа хоспитализирани, а еден од нив починал во болница“, се вели во соопштението на ФСИН, во кое се додава дека четворица други затвореници исто така се ранети во заложничката криза.

Еден од каналите на Телеграм ги идентификуваше затворениците и наведе дека двајца се од Узбекистан, а двајца од Таџикистан. Тројца од нив отслужувале казна за недозволени наркотици, а еден за сериозно оштетување на туѓото здравје.

Медиумите пишуваат дека на локацијата дошол и имамот на регионот на Волгоград за да преговара со киднаперите.

Ова е втор пат летово да има заложничка криза во руски затвор. Во јуни сличен настан имаше во Ростов на Дон.