Зоран Митаноски од Кичево, со учество во играта на среќа Лото 7, застана под среќна ѕвезда

Добивај вести на Viber

Најновиот добитник на премија од играта на среќа Лото 7 - Зоран Митаноски е од Кичево, кој со учество во играта на среќа Лото 7 застана под среќна ѕвезда. 

Добитникот на втората 7ка на Лото 7 и 23тата од почеток на приредување на лото игрите од страна на Државна Лотарија, во тек на вчерашниот ден ги посети нивните просториите и возбудено им ја раскажа својата среќна приказна.

Зоран со своето семејство живее во Кичево, а потекнува од кичевското село Кнежино. Работи веќе 33 години во ЈП Македонски шуми. Живее во четиричлено семејство со сопругата и двата сина еден од 20 и еден од 30 години, сите освен него невработени. Семејството го издржувал со неговата мала плата. Живеат во стан од 50 м2 во најсатара зграда во Кичево, и една од најстарите во нашата земја, градена во 1952ра година. Зоран е роден на денот и во часот на катастрофалниот земјотрес кој на 26ти јули 1963тата го погоди Скопје. По природа е оптимист, човек кој ги сака луѓето и природата, верува во добрина и вели дека на луѓето им требаат што повеќе насмевки.

Зоран Митаноски игра Лото веќе 40 години, сонувал да добие поголема добивка на лото, иако како што рече им се радувал и на добивките од 20 денари за Џокер број со еден погодок. Добитната комбинација ја уплатил на 21ви септември на ден Богородица, на продажно место ТП Аива 5 во Кичево, во близина на општинската зграда на општина Кичево. Раскажува дека пет минути пред да замине на работа во втора смена го уплатил ливчето со последните пари во џебот. Вечерта бил на смена на работа и со колегата го гледале извлекувањето, но не го проверил ливчето, туку ги запишал извлечените боеви на дрвена штичка која му се нашла при рака. Додека ги пишувал бревите се понадевал дека можеби добил 4ка.  Ливчето го проверил утредента. А потоа, со воз се упатил за Скопје, без да ја каже на домашните, вистинската причина за неговото патување. При посета на дирекцијата на Државна Лотарија,  се потврди неговата добивка со донесената потврда за уплата, а и ни го покажа и возниот билет, со последните два броја од серискиот број на билетот - 77. 

По првата средба на која беше потврдена добивка од прва категорија со вредност од 11.966.712,00 денари, од 44то коло во кое беа извлечени броевите,  5, 6,19, 26, 27, 31 и 34, Зоран Митаноски замина во Кичево, за повторно да не посети на 2ри октомври на ден на исплатата, кога ни се довери дека 10 дена, ниту кажал некому, ниту око склопил, но планира среќата да ја сподели истата вечер, на семејна роденденска прослава на правнуката на неговата сестра, каде ќе се собрани сите.

Зоран Митаноски не се откажал од верба во среќата и играл Лото речиси 40 години. Обично ги играл среќните броеви на членовите од неговото семејство, но токму за 44тото коло, во недостиг на време, решил да  одигра квик пик.  Овој пат се чини дека среќата го избрала него.

„Зоран Митаноски веќе прима честитки од своите блиски и сограѓани. Тој го внесе Кичево на мапата на среќни добитници на Лото премија, покрај градовите Свети Николе, Неготино, Тетово, Струмица, Кавадарци, Куманово, Битола и Скопје. Се надеваме дека неговиот пример за транспарентност ќе го следат и сите наши идни добитници на поголеми парични премии од кои најголема е премијата за 7ка во играта на среќа Лото 7, која во моментов изнесува 7.000.000 денари. 

Учеството во игрите на среќа е пред се заради забава, но вербата во среќа може да ве донесе до добивки кои ќе ви го променат животот на подобро.

Кој игра, тој добива!“, соопштија од Државна лотарија на Македонија.