Зошто Гувернерот забрза со презентирање на црното сценарио?

Добивај вести на Viber

Во период на најголема политичка криза во Македонија, аболицираните направија се’ што можат, за да прикажат пресврт во растот и да се легитимираат како „успешни“. Во тоа им помагаа и „независни“ институции.  Особено агилен беше Гувернерот. Во прилог на „успешноста на политиките на власта“ постојано укажуваше на здравите фундаменти на монетарната политика и на зацементираноста на курсот на денарот. Одеднаш, истиот тој Гувернер на кого не му сметаше политичката криза во изминатите две години, пред неколку дена ја корегира  основната каматна стапка од 3,25% на 4%. Истиот тој Гувернер, и покрај основното сценарио  за растот од 3,5% годинава, сега искреира и ново во кое економскиот раст го намалува на 1,6% .  Притоа Богов, не најде за потребно ниту да објасни што се промени во политичката криза, за десеттина дена, за да се случи таков пресврт. Далеку од здравиот разум е да се поверува дека на Гувернерот не му се јасни показателите што аболицираните им ги продаваат на граѓаните како успешни економски политики (здрави фундаменти) во услови кога ништо не им е важно, освен спасувањето на нивната гола кожа. Затоа, неверојатно е ако смета дека „зацементираноста на финансискиот систем“ попушти само од интензивирањето на граѓанските протести против врхушката на власт. За воља на вистината, не ги оптужи директно, но остави впечаток  како тие да се виновни за преземањето на неговите мерки. Со тоа, без аргументи, политичката криза воопштено ја промовира во  алиби за сломот кој и без неа надоаѓаше. Само до пред некој ден машинерија на власта брмчеше со едностраното прикажување на успесите во вработувањето, во индустриското производство, во извозот, во кредитирањето. Свесно ги заобиколуваа податоците кои ја деформираа глобалната слика која укажуваше на трендовите кои фрлаат неповолна сенка врз можностите на идниот развој. Посебно се замижуваше пред влошувањето на степенот на задолженоста на државата и на состојбата во која целиот годишен пораст на БДП веќе оди  на отплата на ануитетските обврски  по основ на досегашните долгови. А, тоа значи дека граѓаните нема да имаат фајде од растот, ако тој не се подигне на повисоко ниво. Опаѓаат и странските директни инвестиции. Увозот бележи надолен тренд. Да не зборуваме за порастот на неликвидноста и за огромната меѓусебна задолженост на стопанските субјекти, вклучувајќи ја и државата, и тоа повеќе како должник. За ова дури и не може да се дојде до веродостојни информации. На секого му е јасно дека  „балонот“ пукна откако се интензивираа граѓанските протести, а претставници од меѓународната заедница отворено ставија до знаење  дека  владејачката партија мора да ги преиспита и да ги повлече  одлуките кои ги покренаа на бунт демократските сили во земјата. Гувернерот се направи дека тоа не го гледа. Не се охрабри да каже дека  власта е таа која предизвика ескалација на кризата  со неразумото однесување во надминувањето на двегодишната криза, со опструкциите во имплементирањето на пржинскиот договор. И дека таа е одговорна за црното сценарио. Со беспоштедните напори да ја избегнат правдата, за стореното и нестореното во вршењето на власта и за да се одржат на власт, тие заглибија во неуставност и незаконитости (невидени во светот) што ја предизвикаа целата прогресивна јавност да се спротивстави на евентуалната можност аболицирани за сомневања за извршени повеќе кривични дела повторно да се најдат на власт. Народот не може и не сака да се определува за таква можност. Знае дека заслужува подобро и нема да престане да бара  да се симне калта со која го испрскаа властодржците со последните случувања. Во горниот контекст индикативно е брзањето со презентирање на црното сценарио. Или Гувернерот знае дека  аболицираните ќе се потрудат разрешницата на кризата да ја насочат и кон „јадење корења“ за тие да се спасат, па кажа, за да не се рече дека не рекол.  Или конечено сфати дека, како и да заврши кризата, исцрпени се можностите на досегашната развојна стратегија (развој заснован врз странски долгови и потрошувачка), па кој и да биде на власт ќе се препелка во зоната на ниски стапки на раст. Д-р Крсте Шајноски