20% од акцизата за горива ќе оди кај Јавното претпријатие за државни патишта!

Добивај вести на Viber

Со одлука на Владата, Јавното претпријатие за државни патишта (до неодамна Агенција за државни патишта) ќе добива 20% од акцизата од нафтените деривати кои се купуваат во Македонија. Износот на парите од делот на акцизата од горивата од државниот буџет ќе се уплатуваат на сметка на Јавното претпријатие за државни патишта. Од ова Јавно претпријатие за Фактор велат дека износот треба да го добиваат на квартално ниво, иако правеле напори сумата да ја добиваат и на дневно ниво. Парите ќе се вложуваат во изградба или реконструкција на патиштата. Агенцијата за државни патишта од почетокот на годинава се трансформира во Јавно претпријатие, кое годинава ќе има буџет од околу 4 милијарди денари (65 милиони евра). Од октомври 2012 година, патарините пренминаа во надлежност токму на Јавното претпријатие за државни патишта. Новоименуваниот директор,  Љупчо Георгиевски, кој во април минатата година ја напушти директорскaта позиција во Катастарот за недвижности и дојде на челната позиција на Агенцијата, најави модернизација на патарините и електронска наплата прво на Коридорот 10, а веднаш потоа и на Коридорот 8. Георгиевски неодамна најави дека е направена нова систематизација со која се опфатени и 250-те вработени од јавното претпријатие „Македонија пат“ кои работат на патарините и кои ќе треба да се придржуваат кон новиот правилник за работа. Јавното претпријатие за државни патишта најави и дека ќе распише и тендер за собирање на парите од наплатните рампи, најверојатно преку банка која ќе биде задолжена еднаш во текот на денот да гарантира за парите и да ги уплати на сметката на јавното претпријатие. К.П