Ахмети и Џафери не дојдоа на судењето на Богоевски, тој најави контра тужби за сите

Добивај вести на Viber

Ахмети и Муса Џафери од ДУИ кои водат приватна судска постапка за нанесена клевета против екс разузнавачот Слободан Богоевски денес не дојдоа во судот на новото рочиште кое е одложено по втор пат. 

Одбраната на Богоевки побара судот да се прогласи за ненадлежен бидејќи изјавата на Богоевски која е предмет на наводна клевета е дадена за американски истражни органи за што веќе се води судска постапка во Њујорк за случајот на незаконско работење на Маѓар Телеком за што има сомнежи дека биле инволвирани и македонски политичари.

„Нека заврши подготвителното рочиште и во зависност од одлуката на судот ќе процесирам кривична пријава против сите инволвирани во постапката бидејќи е очигледно дека сакаат да продуцираат повеќе ефекти – прво, да се правдаат пред електоратот дека, ете, тие се чесни и невини; второ, да издејствуваат каква било пресуда овде во македонските судови, каде што сè се прави по нарачки и да покријат кривична постапка со граѓанска постапка, што е тотален нонсенс, но во Македонија сè е можно“ - изјави Боегоевски.

Од друга страна, пак адвокатката Татјана Поповски, која ги застапува тужителите Ахмети и Џафери, пред судот тврдеше дека изјавата во која се содржеле елементи на клевета Богоевски ја дал во Македонија во адвокатска канцеларија и истата е заверана на нотар, па затоа и има основа за надлежност на македонски суд. 

Судијата им наложи на тужителите да ги обезбедат сведоците, но и оригиналниот транскрипт од изјавата на БогоеEски и го презакажа судењето за 25 мај. Претходно на 7 мај, во Њујорк, Богоески ќе присуствува на соопштувањето на пресудата за случајот против поранешни директори на „Маѓар телеком“ кои според Комисијата за хартии од вредност на Америка поткупувале македонски функционери во 2005 и 2006 година. 

За изјавата на Богоески дека примиле мито од 2,5 милиони евра, Ахмети од Богоески бара отштета од 3 милиони денари, додека Џафери бара 2,5 милиони денари.

Извор: 24vesti.mk