Акциите на Волстрит паднаа од рекордните нивоа

Добивај вести на Viber

Цените на акциите на Волстрит вчера паднаа од рекордните нивоа, при многу скромен обем на тргување, со оглед на тоа дека немаше вести кои би и дале насока на берзата. Dow Jones ослабна 46 поени, или 0,30 отсто, на 15.612 поени, S&P 500 се намали 0,15 отсто, на 1.707  поени, додека, пак, Nasdaq зајакна за 0,09 отсто, на 3.692 поени. S&P 500 и Dow Jones се спуштија од највисоките нивоа во историјата, достигнати во петокот, со оглед дека немаше вести кои би ги поттикнале инвеститорите. Оттука и обемот на тргувањето беше најскромен годинава. Вчера беа истргувани 4,6 милијарди акции, додека просечниот дневен просек во оваа година изнесува 6,4 милијарди. Деловни резултати за второто тромесечје треба да објават уште околу 100 компании од составот на S&P 500 индексот, но не се очекуваат поголеми изненадувања. Досега, деловните извештаи ги објавија околу 400 компании од составот на S&P 500, при што две третини ги надминаа очекувањата на аналитичарите во поглед на добивката, а 55 отсто по прашање на приходите. Инвеститорите не ги охрабри ниту подобриот од очекуваниот податок за растот на PMI индексот за услужни дејности во САД, кој се оттргна од најниското ниво за последните три години. И на европските берзи вчера се тргуваше внимателно. Лондонски FTSE ослабна 43 отсто, на 6.619 поени, франкфуртски DAX за 0,10 отсто, на 8.398 поени, додека париски CAC зајакна, пак, за 0,11 отсто, на 4.049 поени.