Ако вирусите на вечниот мраз се активираат во Сибир, можна е страшна пандемија
Објавено во: Свет 21 Јануари, 2024
Вирусите заробени во вечниот мраз на Арктикот во Сибир би можеле повторно да се активираат и да предизвикаат застрашувачка нова пандемија, предупредија научниците.
Заканата од појава на пандемија предизвикана од овие вируси е зголемена поради климатските промени и глобалното затоплување, што може да доведе до ослободување на смртоносни микроби заробени во пермафростот со милениуми, пишува Гардијан.
Во трудот се наведува дека истражувачите веќе изолирале соеви на т.н Метузалах микроби или зомби вируси, кои предизвикуваат страв од глобално ширење на подмолни болести од далечното минато.
Научниците почнаа да планираат да воспостават мрежа за надгледување на Арктикот која точно ќе ги идентификува раните случаи на болести предизвикани од древни микроорганизми.
„Во моментов, анализата на заканата од појава на пандемија е фокусирана на болести кои би можеле да се појават во јужните региони, а потоа да се шират на север. Малку внимание е посветено на епидемијата што може да потекнува од далечниот север, а потоа да се прошири на југ, што верувам дека е превид. На северот има вируси кои имаат потенцијал да заразат луѓе и да започнат нова епидемија“, вели генетичарот Жан-Мишел Клавери од Универзитетот во Екс-Марсеј.
Марион Купманс, виролог од Медицинскиот центар Еразмус во Ротердам, вели дека не знаеме кои вируси лежат во вечниот мраз, но верува дека постои реален ризик да има некои вируси кои би можеле повторно да се активираат и да предизвикаат пандемија.
„Мораме да претпоставиме дека такво нешто може да се случи“, рече Купманс.