Албански морнар загина во спасувачката акција на грчкиот траект во близина на Крф

Добивај вести на Viber

Еден албански морнар го загуби животот, а друг е тешко повреден за време на спасувачката акција на траектот кој во неделата се запали во близина на грчкиот остров Крф. Грчкиот траект кој пловеше под италијанско знаме тргнал од Патрас до Акона со 478 патници и членови на екипажот, а бил натоварен и со повеќе од 200 возила. Во несреќата до сега се регистрирани десет загинати патници, а 40 други се водат како исчезнати. Портпаролот на полицијата во албанскиот град Валона, Дионис Дуљај, рекол дека двајцата морнари биле погодени при пукање на затегнато челично јаже додека се обидувале да се прицврстат за траектот. Лекарските екипи веднаш ги санирале повредите на другиот настрадан морнар, кој подоцна со хеликоптер бил префрлен во болница во Албанија. Обвинителството во италијанското пристаниште Бари покрена истрага за утврдување на причините за пожарот на траектот. Обвинителството ќе испитува дали несреќата била предизвикана од невнимание, бидејќи италијанскиот сопственик на бродот тврди дека пловилото било во потполност исправно и дека на 19 декември бил извршен технички преглед врз него, вклучувајќи ги и излезите во случај на опасност.