Апасиев верува во заговор по одлуката на Уставен

Добивај вести на Viber

Димитар Апасиев од Левица денеска бешпе најразочаран од одлуката на Уставен суд, според кого референдумот на 30 септември е прописно распишан, и изјави дека денеска е погребана правдата и оти не преостанува ништо друго, освен бојкот на референумот.

- Ова е срамен ден за владеењето на правото во Република Македонија. Денес е погребана правната држава преку политичка, а не правна одлука на судиите, рече Апасиев и додаде дека бојкотот останува како единствено масовно средство за враќање на правната држава.

Професорот верува во заговор дека уставните судии се повикувани на разговор пред денешната седница.

- Наше како јавност е да видиме кој ги повикувал судиите и се обидувал да им влијае врз исходот од оваа иницијатива, рече Апасиев.

Како претставник на вториот подносител на иницијативата беше и Тодор Петров од Светскиот македонски конгрес. И за него одлуката на Уставниот суд не е прифатлива.

- Судиите во расправата беа контрадикторни. Тие отфрлија расправа за договорот со Грција, но заклучија дека со референдумското прашање не се гласа за ЕУ и НАТО, туку за договорот со Грција со кој се врши промена на името на државата. Истовремено, се суспендира референдумот од 8 септември 1991 година, кога народот во апсолутно мнозинство гласаше за самостојна Македонија без додавки и придавки. Иако одлуката на референдум по Устав е задолжителна, Судот за жал, сметаше дека ЕУ не е ниту сојуз за кој треба да се распише референдум, рече Петров.

Според него, одлуката на Уставниот суд ќе ја зацврсти определабата за бојкот на 30 септември.