Австриа против дискусиите за можно отстапување на Грција од монетарната унија

Добивај вести на Viber

Австрискиот канцелар, Вернер Фајман, како и министерот за финансии, Ханс Јерг Шелинг, се изјаснија дека се против секаква дискусија за отстапување на Грција од еврозоната. Минатиот викенд, во Германија, поголем број политичари поттикнале дебата за истапување на Грција од монетарната унија и отстапување од користењето на еврото како валута. Фајман и Шелинг во изјава за австриската државна телевизија, рекле дека Грција мора да се придржува до своите обврски кон меѓународните финансиери. „Сметам дека сосема е непотребно на една земја, која сега се наоѓа пред избори, да и се порачува што се се гледа и мисли. Грчките граѓани имаат право да изберат парламент и влада за која сметаат дека е добра да ја води државата и да ги претставува. Грција и во минатото се придржуваше до обврските и за мене не постои сомнеж дека тоа ќе го прави и во иднина“, нагласил Фајман. Тој истакнал дека дискусијата за можноста од исклучување на Грција од еврозоната е целосно непотребна. Шелинг, исто така, рекол дека навистина нема причина за ваква дискусија и дека не треба да се размислува на сценарио според кое Грција би излегла од ЕУ или еврозоната. Грција, како што оценил, ќе продолжи со својата програма и по изборите ќе продолжи да соработува со ЕУ и Меѓународниот монетарен фонд.