БАЈДЕН ПРЕДУПРЕДИ: „Ако Русија ја сруши Украина, што мислите дека ќе се случи на Балканот?“
Објавено во: Свет 22 Јануари, 2024
Бајден се обидува да ги убеди членовите на американскиот Конгрес да одобрат дополнителна воена помош за Украина.
Претседателот на Соединетите Американски Држави, Џо Бајден, во четвртокот, за време на својот говор во Белата куќа, предупреди што, како што вели, би можело да се случи доколку САД не продолжат да ја поддржуваат Украина во војната со Русија. Тој смета дека тоа би довело до руска победа, но и дека е можно ширење на кризата во балканските земји.
„Ако ние заминеме, а Русија успее да го издржи нивниот напад и да ја урне Украина, што мислите дека ќе се случи во балканските земји“, рече Бајден за време на состанокот со американските градоначалници. „Тоа ја менува динамиката“, предупреди тој.
Бајден, да потсетиме, се обидува да ги убеди претставниците на американскиот Конгрес да одобрат дополнителна воена помош за Украина. Помошта за Украина, која со месеци е блокирана во Конгресот, е дел од законодавството кое обезбедува и финансирање за безбедноста на Израел, Тајван и на американската граница.
Во октомври Бајден побара дополнителна воена помош од 60 милијарди долари за Украина, од која дел ќе се искористи за надополнување на американските резерви. Конгресот претходно одобри околу 75 милијарди долари помош за Украина, пишува американскиот NBC News.
Во текот на минатата есен, претставници на Белата куќа изразија уверување дека Конгресот ќе одобри дополнителна помош, истакнувајќи дека повеќето републиканци и демократи ја поддржуваат. Сепак, отпорот на некои републиканци во Конгресот го закочи законодавството, а преговорите за промени во политиката кон јужната граница, републикански приоритет, беа проблематични.
Највисоките функционери на претседателот Џо Бајден во средата јасно ставија до знаење дека доколку Конгресот не одобри дополнителна воена помош за Украина во следните неколку дена, Русија би можела да победи во војната за неколку недели, најмногу месеци. Советникот за национална безбедност Џејк Саливан и директорката на националното разузнавање Аврил Хејнс ги информираа пратениците дека Украина ќе остане без одредени воздушни одбранбени и артилериски капацитети во наредните недели, пишува NBC News.