БИЗАРНА СМРТ НА ПОЗНАТАТА МИЛИЈАРДЕРКА И БРОДСКИ ТАЈКУН: Анџела Чао пијана со „Тесла“ паднала во езеро по што се удавила
Објавено во: Свет 21 Март, 2024
Американската милијардерка и бродски тајкун Анџела Чао била пијана кога минатиот месец паднала со својот автомобил Тесла во езеро и се удавила на ранч во Тексас, соопшти полицијата, а пренесува Би-би-си.
Канцеларијата на шерифот на округот Бланко соопшти дека нејзиното ниво на алкохол во крвта било речиси три пати повеќе од дозволеното. Тие рекоа дека нејзината смрт била несреќен случај.
50-годишната починала откако вечерала со група пријатели на имот во близина на Џонсон Сити на 10 февруари.
Таа поканила седум пријатели да го поминат викендот на нејзиниот голем ранч, а претходната вечер присуствувале на концертот на раперот Питбул во Остин, се вели во полицискиот извештај.
По вечерата возела со својот автомобил дома, но додека се движела во рикверц, паднала со возилото во езерото. Таа повикала помош, но немало начин да ја спаси. Пријателите се обиделе да ја извлечат, но безуспешно. Дури подоцна полицијата успеала да го скрши стаклото и да ја извлече, но веќе било доцна.
Лидерот на републиканците во Сенатот беше нејзин зет
Анџела Чао беше претседател и извршен директор на семејната бродска компанија Foremost Group, која управува со глобална флота на товарни бродови. Нејзиното богатство се проценува на повеќе од 14 милијарди долари.
Таа беше во брак со Џим Брејер, исто така милијардер.
Нејзината постара сестра, Елејн Чао, е мажена за Мич Меконел, републиканскиот лидер на Сенатот и служеше како секретар за транспорт во времето на претседателот Доналд Трамп и секретар за труд во времето на претседателот Џорџ В. Буш.
Кога минатиот месец објави дека се повлекува од функцијата лидер на републиканците во Сенатот, Меконел посочи дека трагедијата исто така била фактор во неговата одлука.