Бизнисмените на средба со Вучиќ – добредојдени сите што плаќаат најмногу данок

Добивај вести на Viber

Српскиот премиер Александар Вучиќ денеска оствари средба со српските бизнисмени, но и со странските инвеститори во Србија, со цел да ги слушне нивните барања и проблеми, но и да им ги претстави најновите економски мерки на српската Влада. Критериум за средба со премиерот беше висината на платениот данок, па така „во друштво“ на Вучиќ се најде и првиот човек на „Холдингот Делта“ Мирослав Мишковиќ, иако против него се води судски процес за криминална приватизација. „Знаете, за разлика од другите, јас немам подобни и неподобни. Постои само еден критериум врз основа на кој ги повикуваме луѓето, а тоа е - колкав данок плаќате на државата. Јас навистина мислам дека тоа е најчесно“, рече Вучиќ, нагласувајќи дека одлуката за евентуалната вина на Мишковиќ треба да ја донесе судот. На средбата со првиот човек на српската Влада присуствуваа и повеќе други српски бизнисмени, но и неколку министри и претставници на Стопанската комора на Србија. Странските инвеститори добиле ветување од Вучиќ дека ќе продолжат стимулациите за нови вработувања во форма на даночни олеснувања. Така, секој странски инвеститор кој ќе отвори 10 нови работни места во Србија, плаќа придонеси само за три од нив, додека за останатите седум придонесите ги покрива државата. Српскиот премиер вели дека најтешко му паднал состанокот со српските градежници, затоа што од нив слушнал најпесимистички пораки. „Тоа ќе мора да го менуваме и да помогнеме колку можеме - ние веќе немаме ниту водоинсталатери, а за инжинери и да не зборувам“, рекол Вучиќ.