ПО СЕДУМ ГОДИНИ БЛАЖ БРОДЊАК ПОДНЕСЕ ОСТАВКА ОД ПРЕТСЕДАТЕЛ НА НАДЗОРЕН ОДБОР НА НЛБ БАНКА СКОПЈЕ - презема други активности во НЛБ Љубљана

Добивај вести на Viber

Блаж Бродњак, претседател на Управниот одбор на Групацијата на Нова Љубљанска банка Љубљана, повеќе нема да биде претседател на Надзорниот одбор на НЛБ Банка Скопје. 

За ова извести НЛБ Банка Скопје преку Македонската берза за долгорочни хартии од вредност. 

„Врз основа на член 33 од Правилата за котација на Македонска берза за хартии од вредност АД Скопје, НЛБ Банка АД Скопје известува дека на ден 10.10.2024 година, Г-дин Блаж Бродњак, поднесе оставка од функцијата Претседател на Надзорниот Одбор на НЛБ Банка АД Скопје.

До добивање на согласност од Гувернерот на Народната Банка на Република Северна Македонија за именување на нов член на Надзорниот одбор на Банката, г-дин Блаж Бродњак ќе продолжи да ја извршува својата функција како Претседател на Надзорниот Одбор на Банката“, се вели во овјавата од НЛБ Банка Скопје.

Фактор се обрати до Групацијата на НЛБ Банка во Љубљана за објаснување за настанатата промена, а оттаму за нас го дадоа следново објаснување.

„Промената на Надзорниот одбор на НЛБ Банка Скопје се планира веќе извесно време, бидејќи досегашниот Претседател на Надзорниот одбор на НЛБ Банка Скопје, Блаж Бродњак, на оваа функција беше повеќе од 7 години и по последните активности за преземања, презема и други должности во рамките на членките на НЛБ Групацијата.

Блаж Бродњак останува претседател на Надзорниот одбор на НЛБ Банка Скопје до назначувањето и добивањето на сите потребни одобренија на неговиот наследник/наследничка, што, со целосна доверба кон новото раководство на банката, ќе овозможи непречен и континуиран процес на нејзиното работење во иднина.

Во секој случај, Блаж Бродњак во улога на Претседател на Управниот одбор на матичната банка НЛБ д.д. во рамките на својата линија на известување, има целосен ангажман во натамошните развојни активности на НЛБ Групацијата на стратешки исклучително важниот пазар на Република Северна Македонија“, се вели во објаснувањето кое Фактор го доби од НЛБ Љубљана.

Н.Н.Ф.