Богов до Стопанска комора на Македонија: Нема да има дебата за курсот на денарот!

Добивај вести на Viber

Првите луѓе од Стопанската комора на Македонија најавија дека ќе бараат дебата за тоа дали курсот на денарот е реален. Гувернерот Димитар Богов – експресно возвраќа дека за тоа прашање нема да се отвора никаква дебата. И дел од експертската јавност, смета дека ваквата идеја на стопанствениците од Стопанската комора на Македонија би била погрешна и погубна за економијата на долг рок. Одлично е што стопанската комора се вклучува поактивно во предлагањето мерки за подобра бизнис клима, вели универзитетскиот професор Марјан Петрески, и додава дека тоа е особено од аспект што  до владата ретко доаѓаат конкурентни идеи од самиот бизнис. Но, сепак Петрески потенцира дека идејата со курсот на денарот да се помага на реалниот сектор не е соодветна. „Што се однесува до предлогот за тоа како со курсот на денарот да се помогне реалниот сектор, мислам дека коментар не е потребен. Тоа би било сосем погрешно и погубно за економијата на долг рок. Во моментот нема позначајни индикации дека нивото на денарот во однос на еврото е погрешно, односно да не е во линија со фундаментите. Негова промена во насока на поттикнување на извозот веднаш ќе го поскапи увозот, што во услови на висок преносен ефект врз домашните цени ќе влијае неповолно на економијата. На долг рок можни се и други негативни последици. Затоа, за оваа варијанта не треба да се размислува. Извозот треба да се поттикнува само преку релни мерки, што се сведува на една општа цел - извезување производи со повисока додадена вредност, што вклучува поголема ефикасност во работењето и иновација на производите и производните процеси“, вели универзитетскиот професор Марјан Петрески. Пред неколку дена во интервју за Утрински весник, Елисавета Георгиева, потпретседател на Стопанската комора на Македонија најави дека во пакетот мерки што како предлози  ќе бидат доставени до Владата ќе се побара да  биде отворено и прашањето за курсот на денарот. „Предлагаме да се отвори расправа во државата дали курсот на денарот е реален и доволно стимулативен за развој на бизнисот“, изјави за Утрински весник Eлисавета Георгиева, потпретседател на Стопанската комора на Македонија. Сепак, ваквото барање на Стопанската комора на Македонија категорично беше одбиено од гувернерот Димитар Богов, во интервју за „Економски магазин“ на Алсат-М.  Богов упати и порака до стопанствениците дека конурентноста нема да ја добијат со промена на курсот на денарот. „Ваков предлог јас добив од Стопанската комора и во 2011 година. Им кажав дека расправа за тоа прашање не се отвара. Курсот е во надлежност на Народната банка и Народната банка е таа која ќе одлучи каков ќе биде курсот. Сите наши анализи покажаа дека курсот е соодветен и ние поради тоа не губиме од конкурентноста. Значи ние одржуваме иста инфлација како и во Еврозоната, трошоците за работната сила во изминативе 18 години не се зголемени повеќе отколку во еврозоната. Според сите наши анализи конкурентноста не е нарушена поради стабилниоста на курсот. Конкурентноста не се здобива со промена на курсот“, изјави гувернерот Димитар Богов, за „Економски магазин“ на Алсат-М.