Богов: Годинава ќе има спојувања и окрупнувања во банкарскиот бизнис!

Добивај вести на Viber

Македонскиот пазар е претесен за 16 банкарски групации. Во оваа година се очекуваат спојувања на одредени банки во земјава и можен влез на регонален банкарски бренд. Ова во интервју за 24 Вести го најави гувернерот Димитар Богов. “Да, секако 16 банки се премногу. Впрочем и показателите за работењето на банките го покажуваат тоа. Многу од банките, особено помалите, и дел од средните имаат проблем со тоа што имаат премногу мало кредитно портфолио што не им креира доволно приходи за тие да бидат рентабилни на пазарот а со тоа и да остваруваат профит“, изјави Богов. “Решението мора да се бара во окрупнување. Банкарството е скап бизнис. Оваа година јас би очекувал поместувања во банкарскиот сектор. Ќе тргне работата, чекор по чекор, ќе имаме некои спојувања и некои чекори кон окрупнувања. Реално, ние не можеме да очекуваме некои големи банкарски брендови да влезат тука бидејќи поради кризата многу познати банкарски групации се откажаа од инвестиции. Но, да има интерес од некои помали регионални банкарски групации и од инвестициони фондови. Значи јас очекувам прво спојување на веќе постоечки банкарски брендови но многу е веројатно дека ќе влезат и нови, особено од регионот“, додаде Богов. Според гувернерот, иако има најави и интерес, сепак конечниот збор за можните сопственички промени во банките ќе мора да го дадат самите акционери.