Богов: Инфлацијата е на доста умерено ниво

Добивај вести на Viber

Гувернерот на Народната банка Димитар Богов вели дека се охрабрени од податоците за вториот квартал за оваа година за Бруто домашниот производ, каде што после шест квартали на негативни резултати, конечно беше остварена позитивна стапка на раст. Во неделното интервју за Радио Слободна Европа, гувернерот посочува оти очекува тоа да продолжи и во наредниот период. „Cвесни сме дека тој раст во еврозоната и во Европската унија, сè уште е многу слаб и многу ранлив, сè уште таму постојат ризици, но оптимизмот е туке, индикаторите коишто секојдневно излегуваат од економијата на еврозоната се главно позитивни, така што очекувањата се дека тоа соодветно ќе се одрази и на растот во македонската економија. За оваа година нашата проекција сè уште е 2,2 проценти раст, но по објавувањето на податоците за вториот квартал за БДП, веројатно ќе дојде до поместување нагоре. Ние сега ја започнуваме новата рунда проекции којашто ќе биде готова некаде кон крајот на октомври, меѓутоа за очекување е дека растот на Бруто домашниот производ оваа година веројатно ќе биде над 3 отсто“, вели Богов. Според податоците на Народната банка, забележан е раст на штедните влогови. Инфлацијата вели гувернерот не е проблем, бидејќи таа е на доста умерено ниво, 2,8 проценти е последниот податок за август и очекува за целата година, да имаме просечна инфлација од околу 2,8 проценти.