„Бомба“ во судот: Груевски и Јанакиески разговараат за „Преспанците“

Добивај вести на Viber

Во „бомба“ пуштена на денешното рочиште за „Титаник“, односно за местење и оравење притисок за изборни резултати, поранешниот премиер Никола Груевски му вели на екс-министерот за траснпорт и врски Миле Јанакиески дека загубиле поради тоа што ги немало гласачите од Пустец на располагање.

Во еден од разговорите Јанакиески му ги соопштува прелиминарните резултати на Груевски од првиот изборен круг на локалните избори во 2013 година, каде констатира дека во општина Центар е лоша ситуацијата, односно дека водат на само две избирачки места во Капиштец.

„Треба да се прават неважечки ливчиња за да идеме во втор круг“, му вели Јанакиески на Груевски по што експремиерот констатира дека доколку биле гласовите од „Преспанците“ ќе поминеле многу подобро.

Денеска пред обвинетите беа пуштени 88 разговори, а уште „бомби“ ќе има на следното рочиште закажано за 24 октомври.

Експремиерот Груевски заедно со градоначалникот на Пустец, Едмонд Темелко, исто така се обвинети дека противправно ваделе лични карти од општина Центар на жители на Пустец за потоа да ги однесат на гласање во Центар во наредните кругови од локалните избори во 2013 година.

Во случајот за изборни измами „Титаник“ обвинети се 21 лице, меѓу кои поранешниот премиер Никола Груевски, Кирил Божиновски, Миле Јанакиески, Гордана Јанкулоска, Билјана Бришкоска Бошковски, како и Илија Димовски, Мунир Пепиќ, Едмонд Темелко, Леко Ристовски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска.