Буџет 2013 : Подлабок дефицит– послаби капитални инвестиции !

Добивај вести на Viber

Помалку даночни приходи, подлабок дефицит во буџетската каса. Првичните, прелиминарни податоци за реализацијата на Буџетот за 2013 та година покажуваат дека лани, и покрај ребалансираниот буџет, годината заврши со неоствариени проекции. На страната на вкупните приходи има потфрлување од 145 милини евра, додека на расходната страна се реализирани 147 милиони евра помалку. Не се остварија ниту вкупните капиталните инвестиции. Дупката во буџетската каса е зголемена за речиси 5 милиони евра во однос на она што беше планирано за 2013 та година. Помалку пари од ДДВ, повеќе од акциза и увозни давачки!  Во 2013 та година Владата во државната каса по основ на вкупни буџетски приходи, собра 2 милијарди и 277 милиони евра. Оваа сума е за 145 милиони евра помалку од планираните 2,4 милијарди евра, проектирани со ребалансираниот буџет. Потфрлување има и на страната на расходите, наместо 2,7 милијарди евра, државата  потрошила скоро 2,5 милијарди евра. Декемвриските податоци за реализација на Буџетот упатуваат на потфрлувања и на расходната и на приходната страна. Еве што планираше, а што реализираше Владата лани:

•                                                                   План                                 Остварување       
• Вкупни приходи           2,4 милијарди евра                   2,2 милијарди евра
• Вкупни расходи            2,7 милијарди евра                   2,5 милијарди евра

Ако се анализира приходната страна, во делот на приходите од даноци и придонеси, податоците на Министерството за финансии покажуваат дека има значајно потфрлување кај оваа ставка. Така,  Владата планирала да обезбеди нешто повеќе од 2 милијарди евра, а собрала 1,9 милијарди евра од даночни приходи и придонеси.  Приходите од носечкиот данок ДДВ заклучно со декември изнесуваат 647 милиони евра и во однос на планираните 733 милиони евра, лани приходите од овој данок потфрлиле за околу 87 милиони евра. Лани, повеќе пари се собрале по основ на акциза и увозни давачки. Неостварените проекции се прекршија и врз дефицитот – лани тој е поголем за скоро 5 милиони евра од планираниот. Така, во 2013 та година, според податоците на Министерството за финансии бил планиран дефицит од 313 милиони евра, а годината завршила со дупка во државната каса од 317 милиони евра.

•                                                           Планиран                                  Остварен 
• Буџетски дефицит      313,0 милиони  евра                    317, 6 милиони евра

И во ланската 2013 та година, според податоците, Владата не успеа во целост да ги реализра капиталните инвестиции. Според планот, требаше да бидат потрошени скоро 328 милиони евра, додека реализацијата изнесува 270 милиони евра, или во буџетската 2013 та година капиталните инвестиции потфрлија со 20 проценти.

•                                                                   Планирани                        Остварени 
• Капитални инвестиции       327,7 милиони евра            270,0 милиони евра

Лани, рабелансот на Буџетот беше усвоен од владеачкото мнозинство на почетокот од ноември. Владата го прошири буџетскиот дефицит од 3,5% на 3,9%, со образложение дека обезбедува дополнителни 29 милиони евра – финансиска инјекција за Фондот за пензиско и инвалидско осигурување и за Министерството за образование. СДСМ : Владата создаде историски најдлабок дефицит! Иако ланските владини очекувања за позначаен економски раст беа обоени со оптимизам, сепак податоците покажуваат дека во 2013 та година власта собрала скоро идентично ниво на приходи како и во 2012 та година – оценуваат од опозициската СДСМ. Според партијата, лани актуелната власт го трошела до сега најголемиот буџетски дефицит. “Во 2013 година остварен е историски најголемиот дефицит во независна Македонија. Владата потрошила 313 милиони евра повеќе од она што го собрала во државната каса. Тоа го преминува планираниот дефицит изгласан со ребалансот на Буџетот. Во 2013 се реализирани најмали капитални инвестиции во последните три години во износ од 270 милиони евра. За ова говори и податокот дека во 2013 во првите девет месеци бруто инвестициите паднале за 15 проценти“ – оцени Кире Наумов од СДСМ и додаде : “Во 2013 власта собрала скоро идентично ниво на приходи како во 2012, или поточно само за 1,5 процент повеќе од 2012. Доколку власта тврди дека економијата расте за 3,5 отсто и имајќи ја во предвид инфлацијата, овој податок создава дилема. Или растот на економијата не е 3,5 проценти или директорот на УЈП некому прогледува низ прсти. Трето нема“ – изјави Наумов. ВМРО ДПМНЕ: Двојно ги зголемивме каиталните инвестиции! Додека од опозицијата упатува порака до власта да не ја потценува интелегенцијата на народот, од владеачката партија ВМРО-ДПМНЕ возвратија со аргумент дека  просечните капитални расходи се двојно зголемени откако оваа парија е на власт, наспроти 9,9 милијарди денари, колку што изнесувале од 2002 до 2005 кога СДСМ беше на власт. “Ако ги споредите 2005 и 2013 година, капиталните инвестиции во инфраструктурата пораснале за 277 отсто,  а ако споредбата се направи меѓу 2005 и 2014 година, тогаш зборуваме за фантастичен раст на капиталните инвестиции во инфраструктурата од 487 отсто. Откако оваа Влада дојде на власт, изградени се и реконструирани 1.012 километри патишта, 287 училишта, 61 градинка, 178 канализациски мрежи, 150 водоводни мрежи итн., напиша  во соопштението на ВМРО-ДПМНЕ. Партијата посочува дека годинава ќе почне изградба на два нови автопата, Миладиновци - Штип и Кичево - Охрид, ќе продолжи изградбата на автопатот Демир Капија - Смоквица, ќе се врши изградба, реконструкција или рехабилитација на нови 63 километри патишта, меѓу кои и делниците Велес - Катланово и Миладиновци - Куманово и ќе се гради магистралната гасоводна линија од Клечовце до Штип. ВМРО-ДПМНЕ во реакцијата наведува и дека ќе почне изградба на пругата кон Бугарија за која додава дека е единствената капитална инвестиција на СДСМ од која има „неколку жици што зјаат“. - Парите ги потрошивте, а пругата ќе ја гради сега Владата на ВМРО-ДПМНЕ, додава владејачката партија во одговорот до СДСМ. А.Д.