„Буџетот за социјална заштита се намалува за 44,6 отсто“: Левица бара повеќе пари за заштита на загрозените, но и за екологија

Добивај вести на Viber

Нагласеното зголемување на средствата за воените расходи и милитаризација за сметка на намалување на социјалната и еколошката компонента во буџетот е алармантен показател за приоритетите на оваа власт, велат од опозициската „Левица“. 

Истакнуваат дека буџетот за одбрана и купување оружје од САД, е зголемен за 13 отсто, додека, власта на ДПМНЕ, ЗНАМ и ВРЕДИ на сопствените граѓани, односно лицата од социјални категории, по одредени параметри им скратува 40 проценти.

- Економската стратегија на актуелната Влада не само што е заснована на истиот модел од претходната на ДУИ и СДС, туку одлучи и да крати од ранливите категории. Особено е алармантно што буџетот за социјална заштита за деинституционализација и социјални услуги се намалува за 44,6 отсто, што значи 245,401 денари помалку. За споредба, буџетот во одбраната, достигнува рекордни 20,5 милијарди денари. Ова е класична илустрација на владините приоритети.

Дополнително, додека македонските граѓани дишат најзагаден воздух во Европа, изгорена е шума вкупно 4 проценти од територијата на земјата за само едно лето, во делот за заштита на животната средина, буџетот за квалитет на воздухот е намален за вртоглави 33,1 отсто, што не само што нема да ја подобри ситуацијата, туку и директно ќе нанесе сериозни последици врз здравјето на населението - укажуваат од партијата.

Воедно од „Левица“ посочуваат дека имаат голем број амандмански интервенции, се предлага алтернативи за поинаква, поефикасна и поодржлива распределба на средствата. 

- Наместо милијардите за воена опрема и вазалско следење на странските насоки за непотребно вооружување, бараме овие ресурси да се пренасочат во фондови за социјална заштита и влог во екологијата, кои имаат егзистенцијално значење за голем дел од населението - укажуваат од партијата.